Мессининг “Интер”га ўтиши ростми?

Пандемия карантинидан кейин “Барселона”да юзага келган вазият туфайли жамоа етакчиси Лионель Мессини Каталонияни тарк этиши ҳақида турли хабарлар тарқалди. Хусусан, аргентиналик ҳужумчига бош мураббий Кике Сетьеннинг иш услуби ва клуб раҳбариятининг айрим қарорлари маъқул келмагани ортидан у келаси йили якунланадиган шартномани узайтириш бўйича музокараларни тўхтатган эди.

Кейинроқ, “Интер”нинг бақувват ҳомийлари Лионель Мессини Миланга олиб келиш учун катта маблағдан воз кечишга тайёр эканини маълум қилди.

ПСЖнинг италиялик легионер Марко Верратти аргентиналик ҳужумчининг “Интер”га келишига ишонмаслигини маълум қилди.

- Мен ҳам бу миш-мишларни эшитдим. Бу амалга ошмаса ҳам, Мессининг “Интер” билан боғлашаётгани ҳақидаги фактнинг ўзи А Серия аввалги мавқеини тиклаб, буюк футболчилар эътиборига туша бошлаганидан далолат беради. Роналду, Лукаку ва Рибери менинг юртимга бежизга келгани йўқ. Ёш футболчи Де Лигт ҳам Италияни танлаган экан, демак келажакка ишонч бор, - деди Верратти.