Мессининг кейинги жамоаси маълум, музокаралар бошланди

Саккиз карра “Олтин тўп” соҳиби Лионель Месси ўтган йилнинг охирида “Интер Майами” билан якунланган шартномасини янгилаб, бу клубда 2028 йилнинг охиригача қолишга кўнган эди.

Бироқ вазият ўзгариши мумкин. Аргентинанинг “ Ньюэллс Олд Бойз” клуби футбол афсонасини ўз таркибига қўшиб олмоқчи. Клуб вице-президенти Хуан Мануэль Медина 2027 йил январда Лионель Мессини жамоага олиб келиш режаси борлигини айтди ва эҳтимолий трансфер бўйича музокаралар бошланганини тасдиқлади.

- Биз Лео 2027 йил биринчи ярмида “Ньюэллс”да ўйнаши учун ишлаяпмиз, лекин ҳозирча бундан бошқа янгилик йўқ. Бу лойиҳа “Ньюэллс” миқёсидан ҳам катта, у Росарио шаҳри, вилоят ва бутун Аргентина футболи учун мўлжалланган.

Ҳаммаси инфратузилма ва рақобатбардош спорт дастури бўйича нимани таклиф қила олишимизга боғлиқ. Музокаралар бўлган, ғоя кўтарилган, лекин қарорлар ҳали қабул қилинмаган, - деди Медина Toda Pasion нашрига.

Таъкидлаш жоизки, Лионель Месси "Барселона"га кўчиб ўтганга қадар футбол сир-асрорларини айнан мана шу клубда ўрганган. Лео илгари фаолиятини қадрдон жамоасида якунлаш орзуси борлигини айтган эди.