Мессининг рекорди Мбаппенинг соясида кўзга кўринмади

Чемпионлар лигасининг навбатдаги учрашувида Лионель Месси ПСЖ дарвозасини ишғол қилди. Шу тариқа, аргентиналик юлдуз “кўҳна қитъа”нинг энг нуфузли мусобақасида кетма-кет 17-мавсум ўз ҳисобига гол ёзиб қўйди.

Месси турнирда узлуксиз гол уриш бўйича “Реал” ҳужумчиси Раулнинг натижасини такрорлади ва келаси мавсум якка пешқадамга айланиб олиш имконига эга бўлди.

Бироқ, бу тарихий натижа Мессига ҳам, “Барселона” футболчиларию мухлисларига ҳам татимади.

Чунки Мессининг бу кўрсаткичи учрашувда учта гол уриб, беллашувнинг ҳақиқий қаҳрамонига айланган Килиан Мбаппе муваффақияти ортида кўзга кўрингани ҳам йўқ.