“Металлург” бош мураббийи “Сурхон”га қарши учрашувда техник зонага қўйилмайди

“Металлург” бош мураббийи Жасур Абдураимов Coca-Cola Суперлига 12-туридан ўрин олган “Турон”га қарши учрашувдан кейинги матбуот анжуманида иштирок этмай, “2021 йилги мавсумда Ўзбекистон Профессионал футбол лигаси томонидан ўтказиладиган мусобақалар регламенти”нинг 20.6-бандини бузгани учун моддий жаримага тортилганди. 

Жасур Абдураимов 13-турдан ўрин олган “Қизилқум” клубига қарши учрашувдан кейин ҳам матбуот анжуманида қатнашмади ва икки қайта Регламент талабларини бузди. Шундан келиб чиқиб, ЎзПФЛ Абдураимовнинг лицензиясини навбатдаги тур учун бекор қилади. Бу ҳақда ташкилот расмий сайти хабар тарқатди.

Яъни, Жасур Абдураимов 14-турдан ўрин олган “Сурхон”га қарши учрашув вақтида кийим алмаштириш хонасидан тўғри мухлислар секторига йўл олади, учрашув комиссари техник зонанинг захира ўриндиқлари жойлашган қисмига Жасур Абдураимовни қўймайди. 

Хабарда айтилишича, 12-турдан кейин чиқарилган қарор бўйича “Металлург” футбол клуби Жасур Абдураимов жаримасини тўлаб бермагунга қадар, бош мураббий клубнинг келаси учрашувларида ҳам техник зонага киритилмайди.