"Металлург" камида кучли учликда бўлиши керак?! Нега?

Суперлигадаги танаффус сабабли клублар 17 июндан бошланадиган навбатдаги турга тайёргарлик кўришмоқда. Навбати билан клубларимизнинг иштироки бўйича тўхталиб келяпмиз ва бу гал “Металлург” ҳақида мулоҳаза юритамиз.

Бекобод жамоаси жавдалда 9-ўринда кўриниш бермоқда. Уларнинг ҳисобида 9 та ўйин, 2 ғалаба, 4 дуранг ва 3 мағлубият бор. Рақиблар дарвозасига 6 та гол уриб, 10 та тўп олиб чиққан. Тўплаган очколари 10 та. Балки клубнинг ушбу натижаларидан келиб чиқиб, кўпчилик жамоа ўзига мос тарзда дейишлари ҳам мумкин. Лекин биздаги маълумотларга кўра, “Металлург” ҳам бошқалар қатори бу йил маррани катта олган. Шунга таянадиган бўлсак, бу жамоа учун у қадар қониқарли эмас. Айниқса, ғалабалари жуда кам. Уларнинг иккита қолдирилган ўйини бор. 5-турда “Пахтакор”ни қабул қилиши керак эди. Бу баҳс 4 июлга кўчирилган. Шунингдек, “Олимпик” билан баҳси ҳам кечиктирилган. Ўйин ушбу ойнинг 26-санасига белгиланган.

метал2

Биласиз, “Металлург”ни испаниялик Луисма Эрнандес бошқаряпти. Аслида у клуб академиясига бош мутахассис сифатида ўтган йили келганди. Бироқ асосий жамоанинг натижалари яхши тарафга ўзгаравермагач, раҳбарият бош мураббий Жасур Абдураимовнинг ўрнига вақтинчалик Эрнандесни тайинлашди. Унинг ишидан мамнун бўлган мутасаддилар бу йилги мавсумда ҳам клубни испаниялик мураббий бошқаришини хоҳладилар ва келишувга эришилди.

“Металлург” чемпионатни ёмон бошламаганди. Илк турда АГМКни қабул қилиб 1:0 ҳисобида ғалаба қозонди. Кейинги турда Қаршида “Насаф” билан мардонавор кураш олиб бориб, 1:1 ҳисобида дуранг ўйнаб қайтди. 3-турда “Сурхон”ни қабул қилиб яна дуранг қайд этди – 0:0. Хуллас, шу тарзда мавсумни бошлаган бекободликлар ўз ўйинлари билан яхши таассурот қолдираётганди. Лекин қарасак, жамоанинг ғалабаси чўзилиб бораверди. Вазият шундай бўлдики, клуб илк ғалабасини 4 мартда қўлга киритган бўлса, иккинчи ғалабасига 17 май куни эришди. Ўз майдонида “Динамо”ни қабул қилди. Ўша учрашувда аслида бекободликлар мағлубиятга жуда ва жуда яқин турганди. 0:1 ҳисобини ўйинга қўшиб берилган дақиқаларда иккита гол уриб ғалабага айлантиришни уддалашди. Айнан ўша ғалаба туфайли “Динамо”ни бошқарган Предраг Роган истеъфога чиқишига тўғри келганди.

метал1

“Металлург” ўша иккинчи ғалабасига қадар дуранг ва мағлубиятли ўйинларни ўтказиб келди. “Динамо” мағлуб этилгач, Яйпанда “Нефтчи”га қарши саф тортган бекободликлар нокаутга учраб қайтдилар. Бир тур олдинги иродали ғалаба жамоани руҳлантирмагани “Нефтчи” билан баҳсда билинди. Шу куни Луисма Эрнандес жамоаси ўз дарвозасидан учта гол ўтказди ва жавоб қайтариш имконини топа олмади.

Ушбу клуб мана шундай натижаларни қайд этиб танаффусга чиқди. “Нефтчи”даги мағлубиятдан кейин 11-турда “Олимпик” билан ўйини қолдирилганлигини юқорида айтдик. Биздаги маълумотларга кўра, шундан кейин Луисма Эрнандес уйига – Испанияга бориб келган. Ҳозирда жамоаси билан навбатдаги баҳсга тайёргарлик кўрмоқда.

Умуман айтганда, клубнинг натижалари ҳаминқадар бўлса-да, испаниялик мураббийнинг иш услуби, футболга қараши бўйича бошқалардан илиқ фикрларни эшитяпмиз. Яқинда жамоа аъзоларидан бири билан шу ҳақида ўзаро гаплашганимизда у ҳали Эрнандес каби ишга ёндашадиган мураббийни кўрмаганини айтди. Агар унинг кўрсатмаларини тўлиқ бажарадиган бўлсак, “Металлург” камида кучли учликда бўлиши кераклиги ҳақида ҳам таъкидлади. Агар шундан келиб чиқадиган бўлсак, у ҳолда футболчиларга мураббийнинг истакларини амалга татбиқ этишда ижролари етишмаётган бўлиши мумкин.

метал4

Йил бошида таркибда катта ўзгаришлар ҳам бўлди. Раҳбарият селекцияни барвақт бошлаган ҳолда бошқалардан кўра таркибини эртароқ тўлдирди. Ўзлари хоҳлаган футболчилар билан шартномалар имзоланди. Ана шундай футболчилардан бири Забиҳилло Ўринбоев бўлиб, лекин ҳозирча бу ҳужумчи Суперлига доирасида 9 та ўйинда майдонга тушиб ҳали гол ура олгани йўқ.

 Дарвоқе, яқинда клубнинг содиқ ўйинчиларидан бири – Зоҳид Абдуллаев фаолиятини якунлаганини эълон қилди. Ёзги селекцияда Эрнандес таркибда ўзгаришга қўл урадими-йўқми, буни ўзининг фалсафасидан келиб чиқиб амалга оширса керак. Испаниялик мутахассисни янада яхшироқ билишимиз, нималарга қодирлигини, ўзи истаган ўйин услубини кўришимиз учун унга яна вақт кераклиги яққол аён. Раҳбарият ҳам шундай фикрда бўлса керак!

Фикрлар

Фикр қолдириш учун авторизациядан ўтинг!