"Металлург" учун огоҳлантирувчи қўнғироқ! Селекция тўғри қилинганми? Ғалабасиз ўйинлар бош мураббийнинг тақдирига таъсир қиляптими? Жамоа бошлиғи жавоб берди

“Металлург” клуби охирги пайтларда мухлисларини ранжитиб қўйяпти. Айниқса, кеча Бекободда “Сурхон” бир киши кам бўлиб майдон эгаларини доғда қолдириб кетди. Бу “Металлург” учун сигнал бўлиши керак. Чунки жамоа мағлубиятлар гирдобига тушиб қолган ва бу вазиятдан чиқиб кета олмаяпти.

Маълумот учун, “Металлург” охирги марта 9-турда “Насаф”ни 2:1 ҳисобида енгди. Шундан кейин фақат очко улашиб келяпти. 10-тур АГМК – “Металлург” – 2:0, 11-тур “Металлург” – “Навбаҳор” – 2:2, 12-тур “Турон” – “Металлург” – 2:0, 13-тур “Металлург” – “Қизилқум” – 1:2 ва 14-тур “Металлург” – “Сурхон” – 0:1.

Клубнинг натижалари шу тарзда давом этар экан, унда пастга шўнғишда давом этаверади. “Сурхон”га мағлубиятга учрагани эса “Металлург”нинг ўйинида муаммолар борлигини яна бир бор кўрсатиб қўйди. Биз жамоа бошлиғи Шавкат Саидов билан клубга тааллуқли айрим масалалар бўйича гаплашдик. Дастлаб мутахассис жамоасининг кечаги мағлубияти бўйича изоҳ берди.

- Давралар оралиғида раҳбарият билан гаплашгандик. Ўшанда кўпроқ иқтидорли ўсиб келаётган ёшларга эътиборни ошириш ва улар билан натижага эришиш вазифасини қўйдилар. Иложи борича бу йил легионерларсиз, ўзимизни маҳаллий футболчиларни кўтариш ҳам олдимизга қўйилган вазифалардан бирига айланди. Аҳамият берган бўлсангиз, “Қизилқум”га қарши учрашувда қанча ёшларимиз ўйнади? “Сурхон” билан бўлиб ўтган ўйинда ҳам бир қанча ёш футболчиларимиз майдонда тўп сурди. Балки уларга бироз тажриба панд бераётгандир. Эртага жамоамиз йиғилган маҳалда мағлубиятларни таҳлил қилиб чиқамиз. Ҳар бир жамоани йил давомида натижалари барқарор бўлавермайди. Шундан келиб чиқсак, балки биз ҳозир “яма”га тушиб қолгандирмиз. Биз мана шу “яма”дан тезроқ чиқиб кетишимиз керак. Бунинг учун ёшларимизни руҳий тарафдан қўллаб-қувватлашимиз ва уларда мотивацияни уйғотишимиз лозим. 15 кун ёруғ бўлса, 15 қоронғу, деган гап бор. Биз мана шу қоронғуликдан чиқиб кетиш ҳақида ўйлаяпмиз. Ғалаба футболчиларники, мағлубият мураббийники, дейишади. Бундай вазиятда бир-бирини айбдор қилмаслик керак. Таркибда яхши ўйинчилар йиғилган, мураббийлар штабини ҳам яхши деб биламан. Биргаликда ечим топамиз. Бундай шароит, база, яратилган имкониятлар яхши. Масалан, яқин кунларда “El Golazo” билан ҳамкорлигимиз остида академиямизнинг очилиши бўлади. Биз тўғри йўлдамиз. Натижани яхши тарафга ўзгартириш қўлимиздан келади. Фақат ёшларимизга тажриба етишмаяпти.

Трансфер ойнаси очилган маҳалда таркибда айрим ўзгаришлар бўлганига гувоҳ бўлдик. Бир қанча янги ўйинчилар таклиф қилинди, уларнинг орасида ёшлар ҳам бор. Аммо шу билан бирга жамоа етакчилари ҳам “Металлург” билан хайрлашди. Масалан, Дониёр Нарзуллаев, Ихтиёр Тошпўлатов каби ўйинчиларнинг кетиши жамоа учун йўқотиш эди. Бош мураббийнинг таркибда қилган бундай ўзгаришларига жамоа бошлиғи ўз муносабатини билдирди.  

- Жасур Абдураимов бош мураббий бўлиб келганидан кейин Ихтиёр Тошпўлатовга ҳам, Дониёр Нарзуллаевга ҳам имконият берилди. Абдураимов бу ўйинчилар билан хайрлашишни биринчи вазифа қилиб қўйгани йўқ. Мисол учун, Абдураимовнинг ўйин услуби Шипиловники билан умуман бошқа-бошқа. Жамоамизни тарк этган футболчиларга ҳозирги мураббийимиз паст баҳо бергани йўқ. Фақат бош мураббий бу ўйинчилар ҳақида шундай деди: “Улар менинг ўйин услубимга унчалик мос тушмаяпти, агар футбол ўйнайман дейишса, бошқа клубларга кетишига қарши эмасман, аммо қолишига ҳам қаршилигим йўқ”, деган фикрни билдирди. Футболчилар билан алоҳида гаплашиб олганимиздан сўнг, Тошпўлатовни “Турон”га ижарага бердик. Нарзуллаевни “Насаф”га бердик ва у ердан Жавоҳир Каримовни олдик. Ҳолбуки, Нарзуллаев ёки Тошпўлатовнинг ўйинига эътироз бўлгани йўқ. Фақат бош мураббийнинг услубига тўғри келмади.

“Металлург” жамоаси бошлиғи билан гаплашишимизни асосий сабабларидан бири бу бош мураббий масаласи билан боғлиқ эди, десак муболаға қилмаймиз. Боиси, қониқарсиз натижалар туфайли раҳбарият томонидан ҳали ҳам бош мураббийга нисбатан ишонч ўз кучидами? Ёки мураббийнинг курсиси қимирлаб қолганми? Шу ҳақда Шавкат Саидов Sports.uzга қуйидагиларни маълум қилди.

- Жасур Абдураимов клубга таклиф қилинганида вице-президент ва президент билан “Бунёдкор” билан ўйин арафасида учрашганларида шахсан ўзим ҳам қатнашганман. Биринчи давра якунлари бўйича ҳам худди шундай тарзда яна раҳбарият билан суҳбат уюштирилди. Айтишим керакки, Абдураимовга тўлиқ ишонч билдирилган. Мураббий иш бошлаганидан сўнг, жамоа ўйинидаги ўзгаришлар, ҳужумкор футбол кўрсатиш раҳбариятга маъқул. Ёшлар билан ишлаш учун унга каттароқ имконият берилди. Бугунги кунда раҳбарият тарафидан бош мураббийга қатъиян ишонч билдирилган. Ёшлар билан ишлаш йўлида давом этилади. Раҳбарият томонидан академиямизга катта эътибор қаратилиши биринчи масалага айланган. Ўзингиз биласиз, академияни ишга тушириш, инфратузилмасини шакллантириш учун яхшигина сармоя керак бўлади. Шуни ҳисобга олган ҳолда бир-икки йил давомида ёшларга эътиборни ошириш, ўзбек йигитларини тарбиялаш ва уларни муносиб футболчи сифатида шакллантириш мақсади қўйилган. Натижалар Абдураимовнинг фаолиятига таъсир қилмайди.

Ҳаммаси маълум, “Металлург”нинг қониқарсиз натижалари бош мураббийнинг тақдирига сира ҳам таъсир ўтказмайди. Ундай бўлса, клуб ҳозирги вазиятдан чиқиб кетиш ечимини топдими?

- “Металлург”ни мавжуд вазиятдан олиб чиқиб кетиш бўйича ечимини излаяпмиз. Бу борада мутахассислар билан фикр алмашяпмиз. Эртага мураббийлар штаби билан ҳам муҳокама қиламиз. Лекин бу футболдаги оддий ҳолат. Балки кейинги учрашувларда таркибда ротация бўлар. “Сурхон”га қарши баҳс “Металлург”нинг энг ёмон ўйинларидан бири бўлди. Худди шу тарзда чемпионатнинг биринчи турида “Сурхон” майдонида ҳам энг ёмон ўйинни ўтказгандик, - деди Саидов.

Қизиғи шундаки, чемпионатнинг илк турида Термиздаги баҳсда ҳам майдон эгалари қўшимча дақиқадаги ягона гол эвазига уч очкони қўлга киритганди. Бекободдаги ўйинда ҳам “Сурхон” яна қўшимча дақиқада гол уриб ютиб кетди. Балки бу жамоа “Металлург” учун ноқулай рақибга айландими?

- Статистикага қарасангиз, аксинча, “Сурхон” биз учун қулай рақиб саналади. Ўтган мавсумларда бу рақибни фақат ютганмиз. Бироқ бу йил ҳисобидан чиндан ҳам “Сурхон” биз учун ноқулай рақибга айланди. Балки “Қизилқум”га қарши учрашув натижаси ҳам йигитларимизга руҳий томондан таъсир кўрсатган бўлиши мумкин. Ёшларда яққол кўзга ташланадиган нарса – бу барқарорлик етишмаслиги. Аҳамият берган бўлсангиз, Розиев 2002, Абдумажидов 2001, Иброҳимов 2001, Тошқўзиев 1998, Темиров 1999 йилда туғилган. Шу ва яна бошқа йигитларимиз ўтган йиллар давомида ҳали барқарор ўйин кўрсатмаган, Суперлигада. “Насаф” бош мураббийи Рўзиқул Бердиев ҳам ёшлар ҳақида барқарорлик етишмаслиги ҳақида кўп гапиради. Биз уларга ишонишда давом этамиз ва ўз навбатида ёшларда ҳам ўзларида ишонч уйғонса, албатта бу вазиятдан чиқиб кетамиз, - деб сўзини якунлади, жамоа бошлиғи.