"Металлург"нинг қаршисида энди Ўзбекистон Кубогини ютган "Андижон" ёхуд Олмалиқда бизни қандай ўйин кутмоқда?

Маълумки, Ўзбекистон Кубогини қўлга киритган “Андижон” Суперлиганинг 21-турини 19 октябрь куни Олмалиқда “Металлург” жамоасига қарши ўтказади. Маълумот ўрнида айтиб ўтиш лозимки, “Металлург”нинг уй стадиони майдони қайта янгиланиши боис бу йил номинал мезбон сифатида ўз майдонидаги ўйинларда Олмалиқдаги ОКМК стадионидан фойдаланиб келмоқда.

Ушбу мавсумнинг биринчи даврасида “Андижон” ҳамда “Металлург” жамоаларининг “Бобур арена” стадионида 19095 нафар мухлис кўз ўнгида бўлиб ўтган ўйинда 1:1 ҳисоби қайд этилган. “Металлург”дан Далер Шариповнинг 68-дақиқада урган голига “Андижон” ҳимоячиси Владимир Бубанья 75-дақиқада жавоб қайтарган.

“Металлург” ва “Андижон” клублари шу кунга қадар Ўзбекистон чемпионатида жами 43 маротаба тўқнаш келишган. Шундан 18 тасида бекободликлар ғолиб чиқишган. “Андижон” ҳисобида 13 та ғалаба бор. Яна 12 та беллашувда кучлар тенг келган. Тўплар нисбати 70\62 бекободликлар фойдасига.

Бу жамоаларнинг Ўзбекистон чемпионатидаги дастлабки тўқнашуви 1998 йилнинг 8 июнь куни содир бўлган. Ўшанда “Андижон” мезбонлигидаги беллашувда 2:1 ҳисобида ғалаба қозонишган.

Статистика шуни кўрсатяптики, “Андижон” “Металлург” мезбонлигидаги ўйинларнинг иккитасида ғалаба билан қайтган. 2007 йилнинг 14 апрель санасидаги баҳсда “Андижон” сафарда 1:4 ҳисобида ғалаба қозонган. Кейингиси 2019 йилнинг 11 август куни юз берган. Ўшанда Александр Хомяков бошчилигидаги “Андижон” 0:2 натижасини қайд этган.

Жамоаларнинг ўзаро 44-учрашуви қандай натижа билан тугашини биргаликда кузатамиз.