Миржалол Қосимов: "Иккинчи бўлимда бошқа ўйин кўрдик"

Суперлиганинг 4-турига старт берилди. Унда ОКМК Навоийда “Қизилқум” жамоасини 0:1 ҳисобида мағлубиятга учратди ва мавсумдаги илк ғалабасини қўлга киритди. Ўйиндан кейин ОКМК бош мураббийи Миржалол Қосимов матбуот анжуманида иштирок этди.

- Ҳақиқатан ҳам жуда қизиқарли, шиддатли ва курашларга бой ўйин бўлди. Биринчи бўлимда “Қизилқум” жамоаси ёпиқ ўйин кўрсатиб, қарши ҳужумларда ҳаракатланди ва стандартдан гол урдик. Иккинчи бўлимда бошқа ўйин кўрдик. “Қизилқум” кўпроқ ҳужумга ўтиб, босим қилди. Йигитларга раҳмат, шиддатли учрашувда ўйинини кўрсатдилар. Иккинчи бўлимда бизда ҳам имкониятлар бўлди. Аммо охиригача етказа олмадик. Бундан олдинги учрашувларда ҳам мағлубиятга учрамаслигимиз керак эди. Футбол шуниси билан қизиқ. Бугун “Қизилқум” жамоаси ҳам шиддатли, маъноли ва чиройли ўйин кўрсатди.

- Азиз Холмуродовни ўйини ҳақида фикрингиз қанақа?

- Озгина жароҳати бор эди. Жароҳати билан майдонга тушганди. Имкон қадар ёмон ҳаракат қилгани йўқ. Албатта, иккинчи бўлимдаги 100 фоизли имкониятдан фойдаланиши керак эди.

- Ўтган 4 та турга қарасак, жамоангизда ҳар бир ўйинда дарвозабонлар алмашяпти. Бу нима билан боғлиқ? Асосий дарвозабон борми ёки ким яхши формада бўлса ўша ўйнайдими?

- Ҳаммага имкон берилади. Барчаси асосий. Ўз жойини эгаллаш учун ҳаракат қилишяпти. Менимча, Жавоҳир ҳам ёмон ҳаракатланмайди, Ҳамид ҳам! Иккаласи бир хил савияда. Ёшида бироз фарқ бор. Иложи борича машғулотлар орқали тайёргарлик кўриб, ўйинга ҳозирлик кўрилади. Бироқ ҳеч кимга олдиндан сен асосий дарвозабонсан деб айтилмайди.

- “Қизилқум” жамоасининг қайси футболчисини алоҳида таъкидлаб ўтган бўлардингиз?

- Жамоа яхши. Лидери Кенжабоев. Кўриниб турибдики, ҳимоячиларни кўп қийин вазиятларга солиб қўяди. Қолган футболчилари ҳам ёмон ҳаракат қилишмаяпти. Жамоавий ўйин бўйича ҳам мураббийининг айтганини бажаришяпти. Биринчи бўлимда ҳужумларини сабр билан ташкиллаштиришди. 0:1 дан кейин очилишни бошладилар ва бизда ҳам имкониятлар бор эди. “Қизилқум” ёмон таассурот қолдиргани йўқ.