Миржалол Қосимов: "Металлург" жамоасига қойил қолиш керак"

Бугун Суперлиганинг 23-турига старт берилди. Дастлабки ўйин Бекободда “Металлург” ҳамда АГМК жамоалари ўртасида бўлиб ўтди.

Ёмғир остида кечган баҳсда олмалиқликлар Александр Касьяннинг киритган ягона голи эвазига ўта муҳим ғалабани қўлга киритишди.

Учрашувдан кейин АГМК бош мураббийи Миржалол Қосимов таассуротлари билан ўртоқлашди.

- Жуда оғир ўйин бўлди. Негаки, бундан олдин ҳам айтгандим, чемпионат қизғин палласига кирган. Жадвалнинг юқори қисмида ҳам, қолаверса, Суперлигада қолиш учун ҳам ҳар бир жамоа жонини бериб ўйнаяпти. Шу боис бугунги учрашув ҳам бундан мустасно эмасди.

Ўйин қизиқарли ва жанговар тарзда ўтди. Шунингдек, ёмғир остида майдон ҳам футболни тезлатди. Ўйлайманки, ҳақли равишда ғалаба қозондик.

Биринчи бўлимда яхши имкониятларга эга бўлгандик. Гадоевда ҳам вазият бўлганди. Бу – футбол ва шуниси билан қизиқ. “Металлург” жамоасига қойил қолиш керак. Боя айтиб ўтганимдек, ҳар бир очко учун жонини бериб ҳаракат қилди. Ҳеч бўлмаганда бир очко олишга уринишди.

Ёмғир ёғишига қарамасдан мухлислар охиригача қолиб ўз жамоасини қўллаб-қувватлашди. Муҳими, уч очкога эга бўлдик. Жароҳатлар ҳам бўлди. Осон ўйиннинг ўзи йўқ. “Металлург” жамоасига кейинги учрашувларда омад тилаб қоламан, - деди Қосимов.