Миржалол Қосимов сўнгги дақиқаларда қўлга киритилган 1 очко ҳақида нималар деди?

Ўзбекистон Суперлигаси 14-туридан ўрин олган "Локомотив" - АГМК учрашуви ўз ниҳоясига етди. Унда томонлар 1:1 ҳисобидаги дурангга имзо чекди. Ўйиндан кейин ташкил этилган матбуот анжуманида олмалиқликлар устози Миржалол Қосимов иштирок этди ва қуйидаги фикрларни билдириб ўтди:

"Икки хил бўлим гувоҳига айландик. Биринчи таймда жамоалар эҳтиёткор футбол намойиш этди. Иккинчисида эса, фақат ғалаба учун очиқ ўйин бўлди. Менимча, дуранг ҳар икки томонни қаноатлантирди.

Рақиб ҳимоячилари бугун зич ҳаракат қилди. Шунинг учун, жарима майдонига ёриб киришга қийналдик ва узоқ масофадан зарбалар бердик. 5 та ҳимоячига қарши ўйнаш ўзига яраша муаммо туғдиради. Аммо ўз олдига катта мақсад қўйган жамоа бундан қўрқмаслиги керак.

Ўз услубимизни тўғри йўлга қўйиб, вазиятлардан фойдалана олсак, яхши ўйин кўрсата оламиз. Бошқа услубларни ҳам синаб кўрганмиз. Меҳмонда кучли жамоага қарши ҳаракат қилдик ва ёмон ўйин кўрсатмадик".