МЛС клуби Филиппе Коутиньога қизиқиш билдирмоқда

АҚШнинг "Лос-Анжелес Гэлакси" клуби собиқ "Ливерпуль" ва "Барселона" ярим ҳимоячиси Филиппе Коутиньога қизиқиш билдирмоқда. Бу ҳақда AS нашри хабар берди.

Манбага кўра, МЛС клуби яқинда "Васко да Гама" билан шартномасини бекор қилган Коутиньони ўз сафига қўшиб олишга тайёр. Футболчи мухлислар босими сабаб клубни тарк этган.

"Лос-Анжелес Гэлакси" раҳбарияти Коутиньони жароҳат олган Рики Пучнинг ўрнини босувчи футболчи сифатида кўрмоқда. Аввалроқ испаниялик ярим ҳимоячи тизза олд крестсимон боғламларидан жароҳат олган эди.

Маълумот учун, бразилиялик футболчи  2024 йилда "Астон Вилла"ни тарк этиб, "Васко да Гама"га ўтган эди. Унинг 2018 йилда "Ливерпуль"дан "Барселона"га 145 миллион евро эвазига ўтганлиги ҳалигача футбол тарихидаги энг қиммат учинчи трансфер ҳисобланади.