Модрич болалигидан мухлислик қилган клубида ўйнайди

"Реал Мадрид" ва Хорватия терма жамоаси ярим ҳимоячиси Лука Модрич фаолиятини "Милан" клубида давом эттиради, деб хабар бермоқда La Repubblica нашри.

Манбага кўра, хорватиялик футболчи трансферга розилик берган ва "россонери" билан 2026 йил ёзигача мўлжалланган шартнома имзолайди. Музокаралар якуний босқичда. Шунингдек, Модрич болалигидан "Милан" мухлиси экани қайд этилган.

Лука Модричнинг "Реал Мадрид" билан тузган амалдаги шартномаси 2025 йилнинг ёзида, Клублар ўртасидаги Жаҳон чемпионатидан сўнг якунланади. Шу сабабли, 39 ёшли футболчини эркин агент сифатида бепул қўлга киритиш мумкин бўлади.

Модрич 2012 йилдан бери "Реал" сафида тўп суриб келади. Бу вақт мобайнида у клуб билан 28 та соврин, жумладан, 6 та Чемпионлар Лигаси кубогини қўлга киритган. Модрич "Реал" сафида жами 590 та ўйин ўтказиб, 43 та гол урган ва 95 та голли узатмани амалга оширган.