Modrich: "Futbol shafqatsiz sport turi"

Xorvatiya terma jamoasi yarim himoyachisi va sardori Luka Modrich 2024 yilgi Evropa chempionati guruh bosqichi 3-turida Italiyaga qarshi o‘yinda (1:1) qo‘ldan boy berilgan g‘alabadan so‘ng muxlislarga minnatdorchilik bildirdi. Shuningdek, jamoaning guruxdan chiqish imkoniyatlari haqida gapirdi. 

"Muxlislar nima bo‘lishidan qat’iy nazar biz bilan bo‘lishini bilardik. Keyingi bosqichga chiqish uchun g‘alaba qozona olmaganimizdan afsusdamiz. Oxirgi marta 95-daqiqada gol o‘tkazib yuborgandik, bugun 98-daqiqada. Futbol shafqatsiz sport turi va bu bizga (pley-offga chiqish) shunchaki nasib etmaganga o‘xshaydi", - deya Modrichning so‘zlarini keltiradi UEFA matbuot xizmati.

Eslatib o‘tamiz, uch turdan so‘ng Ispaniya terma jamoasi 9 ochko jamg‘arib, "B" guruhida peshqadamlik qildi. Italiya to‘rt ochko bilan ikkinchi o‘rinni egallagan bo‘lsa, Xorvatiya termasi ikki ochko bilan uchinchi o‘rinni band etdi. Albaniya terma jamoasi esa "B" kvarteti turnir jadvalini atigi bir ochko bilan yakunladi.