Моуриньо қачон “Реал” мураббийи сифатида таништирилиши маълум бўлди

Мадриднинг "Реал" клубига бош мураббий этиб тайинланаётган португалиялик мутахассис Жозе Моуриньо бугун, 9 июнь куни пойтахтга етиб келиши кутилмоқда. Журналист Рамон Альварес де Моннинг ижтимоий тармоқларда хабар беришича, мураббийнинг расмий тақдимоти эртага, 10 июнь куни бўлиб ўтади.

Бундан олдин клуб президенти лавозимига яна қайта сайланган Флорентино Перес ўз нутқида "Қироллик клуби" бош мураббийлигига айнан Моуриньо тайинланишини маълум қилган эди.

Жозе Моуринью учун "Реал" янгидан очилаётган саҳифа эмас. У 2010–2013 йиллар оралиғида ҳам мадридликларни бошқарган. Ўша даврда жамоа Испания чемпионлиги, мамлакат Кубоги ва Суперкубогини қўлга киритган.

Ўтган мавсум "Реал" бирор маротаба соврин юта олмади. Мавсумнинг биринчи ярмида жамоага Хаби Алонсо бошчилик қилган, январ ойида у лавозимдан кетгач, клубни Альваро Арбелоа қабул қилиб олган эди. Арбелоа мавсум якунида бош мураббийлик курсисини тарк этди ва энди жамоа рульи яна Моуриньо қўлига ўтмоқда.