Моуриньо Абрахамдан қаттиқ норози, энди Шомуродовга имкон берадими?

“Рома” А Серияда учинчи учрашувини ўтказди. Жозе Моуриньо шогирдлари “Салернитана” ва “Кремонезе” устидан қозонилган иккита кичик ҳисобдаги ғалабадан кейин Туринда “Ювентус” билан 1:1 ҳисобида дуранг ўйнаб қайтди.

Биз эътибор қаратадиган жиҳат, Жозе Моуриньо кетма-кет учинчи учрашувда Элдор Шомуродов хизматидан фойдаланмади. Португалиялик мутахассис легионеримизга умуман имконият қолдирмайдиган кўринади.

Марказий ҳужумда Тэмми Абрахам кутилган ўйинни намойиш қила олмаган вазиятда ҳам Моуриньо ўзбекистонлик шогирдини умуман майдонга туширмаяпти. Ваҳоланки, Элдорнинг асосий позицияси ҳужум марказида ва ўтган мавсумда бир неча марта Тэмми Абрахамдан қолишмаслигини исботлаган ўйинларни ҳам кўргандик.

Олдинги чизиқ вакилларидан Николо Дзаньоло жароҳат олгани, Пауло Дибала ва Тэмми Абрахамнинг ўйини самара бермаётганига қарамай , “Рома” мураббийлар штаби Шомуродовни майдонга чиқараётгани йўқ. Энди таркибга Италия терма жамоаси ҳужумчиси Андреа Белотти қўшилаётганини инобатга олсак, Элдорни яқин ўртада “Рома” сафида кўрмайсиз шекилли.

Жозе Моуриньо “Ювентус”га қарши ўтказилган баҳсдан кейин ўйинни таҳлил қилиб, айрим хулосалари билан ўртоқлашди.

- Ўйинни  қандай бошлаганимиздан хафсалам пир бўлди. Кейин вазиятни ижобий томонга ўзгартира олганимиз менга ёқди.

Яқинда мен ҳар бир ўйин ўзига хос ҳодиса, унинг аввалги ва бўлажак учрашувларга ҳеч қандай алоқаси йўқ эканини айтгандим. Бу гапларимнинг бари ёлғон экан. Чунки ўйинлар эмоционал томондан бир бирига алоқадор.

“Ювентус” билан учрашувнинг энг сўр ўйинчиси ким? Албатта, ҳакам. У 90 дақиқа давомида ажойиб ҳаракат қилди. “Ювентус” 55 дақиқа яхши ҳаракат қилди. Биз эса 35 дақиқа давомида устунлик қилдик.

Мен Тэмми Абрахамнинг ўйиндан кейинги интервьюсини кўрдим. У худди зўр ўйнагандек гапирибди. Гол урганига қарамай, расво ўйнади.

Дибала яхши ҳаракат қилди. Паулодан мамнунман. Беллашувнинг охирги учдан бир қисмида “Ювентус” мухлисларини биздан қўрқа бошлаганини кўрдик, - деди Жозе Моуриньо.

Аслида португалиялик мутахассис янги мавсумда Элдор Шомуродовга ишонч билдирмаслигини маълум қилган эди. Бир неча клуб легионеримизни ўз сафига чорлаганига қарамай, ҳамюртимиз Римда қолди.

Табиийки, ҳали ёзги трансферлар ойнаси ёпилгани йўқ ва айрим клублар ҳамон Шомуродовдан умидини узмагани ҳақида хабарлар чиқиб турибди.

Жозе Моуриньо адолат юзасидан бошқа ҳужумчиларнинг ишлари юришмаётган бир паллада Шомуродовга имкон бериб кўриши керакдир.

“Рома” кейинги турда ўз майдонида дебютант жамоа “Монца”ни қабул қилади. Бу клуб ҳам Шомуродовга қизиқиш билдирганди. Балки Моуриньо аутсайдерга қарши учрашувда Дибала, Абрахам, Пелегрини каби катта ўйинчиларни безовта қилмасдан, Элдорга имкон берар.

Наилож, 30 августни кутамиз.

Жамоасига илк ғалабани келтирган футболчимиз энг зўрлар қаторидан жой олди!

Европа клублари назарига тушган легионеримиз яна гол уриб, жамоасини биринчи ўринга кўтарди!

Шомуродов Россияга қайтадими?

“Рома”: Шомуродов супертўпурар йўлини тўсиб турибди!