Моуриньо билан бирга ишлаган, Роналдуга қарши ўйнаган Друлович!

Келаси йилнинг январь ойида Таиландда U-23 Осиё чемпионати мусобақаси бўлиб ўтади. У ерга эса вакилларимиз мусобақанинг амалдаги чемпиони сифатида ташриф буюрадилар. Хабарингиз бор, Ўзбекистон олимпия терма жамоаси ҳам ушбу турнирга тайёргарлик кўрмоқда. Асосий мақсадимиз эса Токиода бўладиган Олимпиада йўлланмасини қўлга киритишдан иборат. Бунинг учун эса вакилларимиз Осиё чемпионатида муваффақиятли иштирок этиши талаб этилади. Шунинг учун бош мураббийликка сербиялик таниқли мутахассис Любинко Друлович таклиф қилинган.

У 2013 йили ёшлар ўртасида бўлиб ўтган Европа чемпионатида Сербия терма жамоаси бош мураббийи сифатида чемпионликни қўлга киритган. Энди эса Ўзбекистон билан ҳам муваффақиятларга эришишга бел боғлаган. Друлович ўз вақтида Португалия чемпионатида 10 йил давомида тўп сурган ва қатор ютуқларга эришган. Қолаверса, таниқли мураббий Жозе Моуриньо билан ҳам бирга ишлаган. Умуман олганда, Любинко кўпни кўрган мутахассис. Куни кеча ўзи билан учрашиб, бир қатор қизиқарли масалалар бўйича суҳбатлашдик.  

«Бу ерга Ўзбекистонни Олимпиадага

олиб чиқишга ишонганим учун келганман»

- Ўзбекистондаги ҳаётингизга тўла-тўкис мослашиб кета олдингизми?

- Мен профессионал мураббий сифатида кўп давлатларда фаолият кўрсатганман. Шунинг учун ҳар доим янги мамлакатга келганимда бу менга кўникишим учун қийинчилик туғдирмайди. Шундай экан, Ўзбекистонга ҳам аллақачон мослашиб бўлганман. Биласизми, бу ерга келганимида бизни Ўзбекистон футбол ассоциацияси раҳбарияти ва ходимлари жуда илиқ кутиб олишди. Қаерга бормайлик, доимо бизга ҳурмат билан муносабатда бўлишяпти. Бундан ташқари, олимпия терма жамоасидаги мураббийлар штаби ва ишчи ходимлар билан ҳам жуда тез чиқишиб кетдик. Мана, ҳозиргача улар билан жуда яхши муносабатдамиз.

- Айтинг-чи, бунга қадар ўзбек футболи ҳақида қандай тушунчага эга эдингиз?

- Ўзбекистонга келишдан олдин ҳам ўзбек футболи ҳақида етарлича маълумотларга эга эдим. Шуниси аниқки, Ўзбекистон терма жамоаси Осиёдаги кучли термалардан бири ҳисобланишини ҳам билардим. Шу билан бирга Ўзбекистон чемпионатида кўплаб сербиялик футболчилар тўп суришади. Айнан улар орқали ҳам мен ўзбек футболи тўғрисида кўплаб маълумотлар олганман. Қўшимчасига яна шуни айтмоқчиманки, юртингиздаги ўйинчилар жуда иқтидорли. Лекин бундай иқтидор нафақат Ўзбекистонда, балки бутун дунёда фақат 10 фоизни ташкил қилади. Қолган 90 фоизи эса меҳнатдан иборат. Шу боис футболчи ўз устида фақат ишлаши керак. Бундай усул бутун дунёда қўлланилади. Ўзбекистонда иқтидорли футболчилар кўп деб бежизга айтганим йўқ. Улар ўз устиларида янада кўпроқ ишлашса, бу фақат ўзбек футболи учун катта ютуқ.

- Сизни бу ерга таклиф қилишдан мақсад битта: терма жамоамизни Олимпиада мусобақасига олиб чиқиш. Шу боис бундай юксак вазифа бажарилиши йўлида ўзбекистонлик мухлислар сизга умид кўзи билан қарамоқдалар. Бундай вазиятда олимпия терма жамоамиз билан натижага эришиш йўлида сизга ортиқча босим бўлиши мумкинми?

- Қаерда ишлашингиздан қатъий назар сизга ташқи босимнинг бўлиши бу табиий ҳолат. Лекин биз профессионалмиз. Шу боис бундай босимлар бўлишига кўникиб кетганмиз. Аслида ҳам бундай босимлар ҳар доим бўлади. Лекин шуни алоҳида айтиб ўтишим керакки, агарда Ўзбекистон олимпия терма жамоасини Олимпиадага олиб чиқишимга ишонмаганимда бу ерга келмаган бўлардим. Шуни яхши тушунишингларни истардимки, мен бу мамлакатга бекордан-бекорга келганим йўқ. Ўзбекистонни Олимпиадага олиб чиқишга кўзим етгани учун ҳам ишлашга розилик берганман. Шундай экан, биз бу жамоа билан ўз олдимизга қўйилган вазифаларни албатта бажара оламиз. Ҳозирги кунда Олимпиадага йўлланмани қўлга киритиш учун асосий номзодлардан биримиз. Келаси йили Осиё чемпионати бўлиб ўтади ва ушбу мусобақанинг ҳам ўзига яраша фаворитлари бор. Ҳозирги шакллантираётган жамоамиз билан Япония, Жанубий Корея, Эрон, Саудия Арабистони, Автсралия каби термаларга қарши бемалол баҳслаша оламиз ва бу борада имкониятлар 50х50. Қайсидир жабҳаларда эса улар ёки биз устунроқ бўлишимиз мумкин. Лекин биз ўша фаворитларни мағлубиятга учрата оладиган жамоани шакллантириб боряпмиз. Осиё чемпионатида уларга бемалол қаршилик кўрсата оламиз деб ўйлайман.

- Ўша Осиё чемпионати учун Тошкентда саралаш баҳслари ўтказилганди. Ўшанда Тожикистонга қарши учрашувдан кейин айтган гапингиз кўпчиликда эътирозларга сабаб бўлганди. Яъни, жамоамиз ютиши керак бўлган баҳсда нурсиз дуранг қайд этганди ва бу жамоамизнинг ўйини кўпчиликка ёқмаганди. Аммо сиз учрашувдан сўнг жамоамизни фантастик ўйин кўрсатди дея изоҳ бергандингиз. Ростдан ҳам шундай деганмисиз? Агар айтган бўлсангиз нима учун шу гапни айтгансиз?

- Футболда энг асосийси натижа туради. Биринчидан, ўша ўйиндан аввал шогирдларим машғулотларда амалга оширган усулларимиз ва кўрсатмаларимизни майдонда кўрсатиб бера олишди. Шунга асосан йигитларимиз учрашувдан олдинги берган барча кўрсатмаларимизни бажаришди. Иккинчидан, шунинг эвазига биз Тожикистондан ҳар жабҳада устунлигимизни майдонда кўрсата олдик. Тўпни назорат қилиш, ҳужумлар уюштириш, аниқ паслар сони, умуман айтганда, статистик тарафлама биз уларни ютдик. Тожикистон эса бутун ўйин давомида бизнинг дарвозамиз томон бирор марта бўлса ҳам аниқ зарба бера олмади. Тожикистонликлар ҳимояда автобус режимини қўллашди ва олдиндан режалаштирилганидек, фақат дуранг учун ўйнашди. Уларни мақсади айнан дурангга қаратилганди. Шогирдларим мен берган кўрсатмаларни бажаришганини кўриб, шунга асосан фантастик ўйин кўрсатишди дея таъриф берганман. Фақат ўшанда бизга гол етишмади холос. Замонавий футболда энг асосий нарса бу – мақсад. Бизнинг мақсадимиз нима эди? Албатта, Осиё чемпионатига чиқиш. Олдимизга қўйилган дастлабки вазифани эса бажардик. Биз учун асосийси шу.

«Сербия билан чемпионликдан кейин

ҳаётимда ҳеч қандай ўзгариш бўлгани йўқ»

- 2013 йили Сербия ёшлар терма жамоасини Европа чемпионига айлантирган ҳолда тарихдан жой олгансиз. Айтинг-чи, ўша чемпионликдан кейин ҳаётингизда нималар ўзгарди?

- Ўша чемпионликдан кейин ҳаётимда ҳеч қандай катта ўзгариш бўлгани йўқ. Ҳар доим бирор ютуққа эришсам, кейинги мақсадим бундан ҳам каттароқ муваффақиятларга эришиш бўлади ва шунга қараб ҳаракат қиламан. Аслида Ўзбекистонга янги марраларни забт этиш учун келганман. Насиб қилса, Ўзбекистон билан барча ўйлаган мақсадларимизга эришиб, ўзбек футболи тарихидан жой олиш ниятим бор. Мен ҳар сафар янги марраларни забт этиш иштиёқида курашаман. Ўзбекистон эса бу борада мен учун ажойиб чорлов.

- Яна ўша Европа чемпионатига қайтадиган бўлсак, бугунги кунда юлдуз даражасига кўтарилган Митрович, Милинкович-Савич ва яна бошқа таниқли футболчилар ўша пайтда сизнинг қўл остингизда тўп суришган. Хўш, улар билан ҳозир ҳам алоқадамисиз?

- Баъзилари билан алоқамиз бор, яна баъзилари билан алоқамиз йўқ. Буни нормаль ҳолат деб ҳисоблайман. Ахир бу – ҳаёт. Лекин бир нарсани алоҳида айтишим керакки, ўша пайтдаги таркибимиздаги аксарият ўйинчиларнинг тинимсиз меҳнати ва ҳаракатлари натижасида бугунги кунга келиб номдор футболчилар даражасигача кўтарилиб боришди. Оддий мисол, ўша пайтда бизнинг сафимизда ўйнаган футболчилардан етти нафари бугунги кунга келиб Сербия миллий терма жамоаси таркибида тўп суришяпти. Мана, ҳозирда Ўзбекистон олимпия терма жамоамиздан уч нафар футболчи миллий терма жамоа сафига қўшилишди. Умид қиламанки, яқин келажакда яна бошқа йигитларимиз ҳам миллий термада ўйнай оладилар. Олимпия жамоамиз эса бунинг учун уларга трамплин вазифасини бажаради. Бу борада ҳам уларга ёрдам беришга ҳаракат қиламан.

«Моуриньо менга кўп ёрдам берган»

- Интернет орқали сиз ҳақингиздаги маълумотларни излаганимизда учта фуқароликка эгалигингизни кўрдик. Сербия, Португалия ва собиқ Югославия. Учта фуқаролик сизга нима учун керак?

- Илгари Сербия Югославиянинг таркибида бўлган. Қачонки, Югославия бўлиниб кетганидан кейин Сербия алоҳида давлатга айланди. Шу боис менда эндиликда иккита фуқаролик бор: Сербия ва Португалияники. Сербия туғилиб ўсган ватаним бўлса, Португалияда «Порту»да ўйнаганман ва шунинг учун ушбу мамлакат фуқаролигини ҳам олганман.

- Сиздан айнан Португалиядаги футболчилик фаолиятингиз ҳақида ҳам сўрамоқчи эдим. Сиз у ерда узоқ вақт давомида «Порту» шарафини ҳимоя қилгансиз ва кейин «Бенфика»да ҳам тўп сургансиз. Бир сўз билан айтганда, Португалия футболида ҳам ўзи хос ном қолдиргансиз. Ўша пайтларда эса Жозе Моуриньо ва Криштиану Роналду ҳозиргидек машҳур эмасдилар ва улар энди кўзга ташланиш босқичида эдилар. Португалиядаги фаолиятингиз ҳақида гап кетганда, нималарни айта оласиз?

- Португалияда 10 йил давомида тўп сурганман. Ўзингиз айтганингиздек, «Порту» ва «Бенфика» жамоаларида ўйнаганман. Португалия ҳақида ҳар доим менда ажойиб хотиралар қолган. У ерда Португалия чемпиони, Суперубоги ва яна бир қатор ғалабаларга эришганман. «Порту»да ўйнаган пайтимда марҳум Бобби Робсон бош мураббий эди. Жозе Моуриньо эса унга ёрдамчи бўлиб ишларди. Айтишим керакки, 2,5 йил давомида Моуриньо билан бирга ишлаганмиз. Жозе билан жуда яхши алоқага эгаман ва биз дўстмиз. Ҳозиргача у билан гаплашиб турамиз. Сербия терма жамоасини бошқарган пайтимда эса Моуриньо менга жуда катта ёрдам берган. «Порту»дан «Бенфика»га ўтганимда эса Криштиану Роналду ва Рикардо Куарежмага қарши ҳам ўйнаганман. Ўша пайтларда улар «Спортинг»да фаолиятини энди-энди бошлашаётганди. Роналду ҳақида нима дейишим мумкин? У барча ёш футболчилар учун ажойиб намуна. Агар ёшлар унга қараб ўсадиган бўлишса, бу фақат фойдали бўлади. Роналдуни ҳар доим ўз устида кўп ишлаган ва меҳнатсевар футболчи сифатида биламан.

«Менга Европа чемпионлар лигаси ғолиблиги етишмайди»

- Сиз учун ким кучли: Мессими ёки Роналдуми?

- Бирирчи навбатда Криштиануни жуда ҳурмат қиламан. Боя айтганимдек, уни барча ёш футболчиларга намуна сифатида кўрсата оламан. Охирги бор олтин тўпни қўлга киритганидан кейин у шу ёшида ҳам ўзи учун янгидан-янги марраларни забт этиш учун мақсадларни қўймоқда. Шунинг учун ҳам Роналдуни ҳурмат қиламан. Мессига келсак, мен иккала футболчини бир хил даражадаги ўйинчилар деб ҳисоблайман. Уларни бир-биридан устун қўйиб кўрсатиш ниятим йўқ. Лекин мен ҳамма вақт Роналдуга қойил қолганман.

- Сиз «Порту» учун кўп меҳнат қилгансиз. Лекин у ердан кетганингиздан кейин орадан кўп вақт ўтмай «Порту» аввалига УЕФА Кубогини, кейин эса чемпионлар лигасини ютди. Ўша таркибда бўлмаганингиздан афсусланмаганмисиз?

- Йўқ, менга алам қилмаган. Мен ўшанда 35 ёшга тўлгандим ва ўз юртимга қайтиб, «Партизан» сафида ўйнаётгандим. Ўшанда Европа Чемпионлар лигасининг гуруҳ босқичида «Партизан» билан бирга «Реал», «Порту» ва «Марсель» жамоалари жой олишган ва уларга қарши ўйнаганмиз. Айнан ўша йили «Порту» чемпионлар лигаси ғолибига айланганди. Тан олиш керакки, ўша йили чиндан ҳам «Порту» ҳаммадан кучли эди. Лекин менда сира хафагарчилик бўлмаган. Ахир вақт олий ҳакам ва ёшим ҳам ўтиб бораётганди. Биласизми, менинг футболчилик фаолиятимда битта соврин етишмайди: у ҳам бўлса, Европа Чемпионлар лигаси ғолиблиги. Мен футболчи сифатида 14 та соврин ютганман. Лекин чемпионлар лигаси ғолиблиги менга етишмайди.

- Қизиқ савол. Баъзида мураббийлар ўз жамоаси билан бирор мақсадга эришмоқич бўлса, ўзига хос ваъдаларни беришади. Масалан, Бора Милутинович ўз вақтида Хитойни бошқарганида, терма жамоа жаҳон чемпионатига чиқа олмаса, ўзини буюк Хитой деворидан ташлаши ҳақида айтган. Валерий Газзаев эса ЦСКА билан УЕФА Кубогини ютса мўйловини олдириб ташлаши ҳақида айтган. Сиз Ўзбекистон билан Олимпиада йўлланмасини қўлга  киритсангиз, ёқимли анаънангиздан воз кечиш учун қандай  ваъда берасиз?

- Мен учун энг муҳим нарса – Ўзбекистонни Олимпиадага олиб чиқиш ва Ўзбекистон тарихига кириш. Менинг бош мақсадим ҳам шу. Бора Милутинович ёки Валерий Газзаевнинг айтган гапларига қизиқишим йўқ. Мақсадим Ўзбекистонда натижа кўрсатиб, тарихдан жой олиш.