Моуриньо: Бу футболчи бизни Чемпионлар лигасига олиб чиқади! 

“Рома” раҳбарияти “Валенсия” ҳужумкор футболчиси Гонсалу Гедешни трансфер қилишга уринмоқда, - деб хабар тарқатди Tuttosport нашри.

Манбанинг таъкидлашича, римликлар бош мураббийи Жозе Моуриньо ўз ҳамюрти ёрдамида келаси мавсумда А Серияда кучли тўртликка кириб, Чемпионлар лигаси йўлланмасига эга чиқмоқчи. Буни амалга ошириш учун пойтахт клуби раҳбарияти сезиларли даражада харажат қилишга тайёр.

Гедешнинг олдида иккита йўл турибди. Португалиялик юлдуз “Рома” таклифини қабул қилишга мойиллиги айтилмоқда. Бунда “Рома”ни Жозе Моуриньо бошқараётгани муҳим омил бўлиб хизмат қилади.

“Валенсия” мутасаддилари ўз юлдузининг яна икки мавсумдан кейин тугайдиган шартномасини узайтиришга ҳаракат қиляпти.

25 ёшли ҳужумкор футболчи мавсумни 42 та ўйин, 13 та гол ва олтита голли узатма муаллифи сифатида якунлади. Transfermarkt портали Гонсалу Гедешни 40 миллион еврога баҳоламоқда.

Биз учун қизиғи шундаки, Гонсалу Гедешнинг асосий амплуаси чап қанот ҳужумчиси ҳисобланади. "Рома"да айни пайтда бу позицияда Элдор Шомуродов ўйнайди. Португалиялик футболчи худди легионеримиз каби ҳужум марказида ҳам самарали ҳаракат қила олади.