Моуриньо назоратни кучайтирди: Қоидани бузган ўйнамайди!

“Реал” бош мураббийи Жозе Моуриньо Мадрид жамоасидаги интизом талабларини кучайтирди: машғулотларга кечикиш футболчининг навбатдаги ўйинни ўтказиб юборишига олиб келиши мумкин. Шунингдек, футболчиларнинг тикланиш жараёни ва овқатланиши энди қатъий тартибга солинган. Бу ҳақда The Sun хабар берди.

Манба маълумотига кўра, мадридликларнинг янги мураббийи машғулотларга кечикиш учун пул жарималарини бекор қилган ва янада қаттиқ жазо чорасини жорий этган.

Машғулотга белгиланган вақтда келмаган футболчи тренажёр залига юборилади ва кейинги ўйинни ўтказиб юборади.

Моуриньо тартибининг асосий элементлари — вақтида келиш, машғулот, тикланиш ва овқатланиш.

Жароҳат олган футболчиларнинг тикланиш жараёнлари фақат клуб базасида ўтказилиши керак.

Бундан ташқари, футболчилар ўз хоҳишига кўра овқатланиш тартибини танламайди, балки клуб тавсияларига амал қилиши шарт.

Моуриньонинг бу ёндашуви маълум даражада Арсен Венгернинг “Арсенал”даги усулларига ўхшайди. Манбанинг ёзишича, португалиялик мураббий “Барселона”да Ханс-Дитер Флик қўллаётган амалиётдан ҳам илҳомланган. Каталония клубида ҳам машғулотларга кечикадиган футболчилар учун қатъий қоидалар мавжуд.

Жозе Моуриньо 11 июнь куни расман Мадриднинг “Реал” клуби бош мураббийи этиб тайинланган ва 2029 йилнинг ёзигача давом этадиган шартнома имзолаган.