Моуриньо “Реал”га тайинланса, “Барса”да порлаган юлдузни олиб келади

Европа оммавий ахборот воситалари “Реал”  раҳбарияти бош мураббий Альваро Арбелоа ўрнига тажрибали мутахассис Жозе Моуриньони олиб келиши ҳақида маълумотлар чоп этмоқда.

Сўнгги хабарларга қараганда, “Бенфика” билан хайрлашиб, Мадридга бориши кутилаётган Жозе Моуриньо янги жамоасига “Барселона”да ўйнаётган Маркус Рэшфордни олиб келиш истагини билдирди.

Бу ҳақда Football365 нашри The Independent журналисти Мигел Деланига таяниб хабар берди.

Маркус Рэшфорд аслида “Манчестер Юнайтед”га тегишли ва жорий мавсумда “Барселона”да ижара асосида ўйнаяпти. Каталонияликлар ҳали тажрибали ўйинчини тўлиқ трансфер қилиш бўйича якуний қарорга келгани йўқ.

- Моуриньо Рэшфорд билан яхши муносабатларга эга, шунинг учун у бу ишни мамнуният билан амалга оширган бўларди, деган ҳиссиёт бор. Биринчидан, ўзи яхши танийдиган кучли футболчини қўлга киритиш муҳим.  Иккинчидан, ҳозирнинг ўзидаёқ “Барселона” учун муаммо яратиш имкони туғилди, - деб ёзди Мигел Делани.

Моуриньо Маркус Рэшфорд билан “Манчестер Юнайтед”да 2016 йилдан 2018 йилгача бирга ишлаган ва бир бирининг имкониятларини жуда яхши  билади.