Моуриньонинг гапи ўтмади: “Рома” у ҳайдаган ўйинчини олиб қолди!

“Рома” бош мураббийи Жозе Моуриньо “Сассуоло”га қарши ўйинда қўпол хатога йўл қўйган Рик Карсдорпни жамоадан ҳайдаган эди.

Клуб спорт директори Тьягу Пинто футболчидан қутилиш учун январда уни сотиб юбориш бўйича иш олиб борди. Бироқ, 27 ёшли нидерландиялик ҳимоячини 10-12 миллион еврога трансфер қиладиган клуб топилмади.

“Рома” раҳбарияти Рик Карсдорпни жамоада олиб қолишга қарор қилди. Ҳозир мутасаддилари футболчи ва бош мураббийни яраштириб қўйиш йўлини қидиряпти.

Гарчи Карсдорп Португалияда ташкил этилган ўқув-машғулот йиғинида иштирок этган бўлса-да, Моуриньо билан мулоқот қилаётгани йўқ.