"Муангтонг Юнайтед"ни тарк этган легионеримиз ортга қайтяптими?

Июль ойида юртимизда трансфер ойнаси очилади. Табиийки, бу вақтда футболчиларнинг бозори яна “юради”. Чемпионатимизда биринчи давра яна бир турдан кейин тугайди ва клублар ёзги таътилга чиқадилар. Табиийки, ҳозирда жамоалар ёзги йиғин режаларини ишлаб чиқишган ва селекцияда ҳам аллақачон ишларни олиб бормоқдалар. Шунинг учун ёзги трансфер ойнаси пайтида клубларимизда янги номлар пайдо бўлади, бу аниқ. Масалан, хорижда тўп сураётган легионерларимизнинг яна чемпионатимизга қайтиши кутилмоқда.

Сардор Мирзаевни яхши танийсиз. У легионер сифатида Таиланд чемпионатида фаолият олиб бораётганди. Маълумот учун, 2020 йил бошида “Локомотив” клубидан Таиланднинг “Муангтонг Юнайтед” жамоасига кўчиб ўтган ҳамюртимиз Сардор Мирзаевнинг жамоаси билан тузган шартномаси якунланди.

Бошида унинг учун “Тай” лигадаги ишлари  яхши кетаётганди. Охирги пайтларда омадсизлик юз берди ва “Муангтонг Юнайтед” қуйи лигага равона бўлди. Шу ва юқоридаги сабабларга ҳужумкор футболчи МЮ билан хайрлашди. Таъкидлаш жоизки, Мирзаев у ерда 3,5 йилни ўтказди ва ўзига яраша ҳурмат-эътибор қозона олди. Ҳар холда бир клубда легионер сифатида 3 йилдан зиёд вақт давомида тўп суриш осон иш эмас.

Яқинда унинг ўзи Sports.uz сайтига берган интервьюсида Ўзбекистондан ҳам таклифлар бўлаётгани тўғрисида гапирганди. Бизга маълум бўлишича, Таиланд чемпионатини тарк этган Мирзаевга ҳозирда Суперлигамиздан аниқ таклифлар бор. Бу борада айрим жамоалар футболчи масаласида ўзаро рақобатлашишига ҳам тўғри келса ажаб эмас. Айниқса, медаллар учун курашаётган клублар Сардор Мирзаевга кўз тикишганлиги айтилмоқда. Тез орада барчаси узил-кесил ҳал бўлади. Катта эҳтимол билан Мирзаев Ўзбекистонга қайтади.

Шуҳратбек Жўраев.