Муҳсин Низомиддинов: "Биринчи бўлимда бироз мувозанатни йўқотдик"

Про лиганинг 5-турида “Қўқон-1912” меҳмонда “Олимпик Мобиуз”ни 1:3 ҳисобида таслим қилди. Учрашувдан сўнг меҳмонлар бош мураббийи Муҳсин Низомиддинов қуйидагича фикр билдирди.

- Авваламбор, яқинлашиб келаётган Рамазон Ҳайит байрами билан барчани табриклаймиз. Рўзанинг охирги кунлари, шунга қарамай, учрашувга тайёрланиб келдик. Бизда деярли ярим жамоа рўзадор. Шу нарса бизга халақит қилмасин деб қўрқиб тургандим. Биринчи бўлимда бироз мувозанатни йўқотдик, бўш зоналар очилиб қолди. “Олимпик Мобиуз” футбол ўйнашни биладиган, класси бор бўлган Ўзбекистондаги энг яхши ёшлардан иборат жамоа. Булар билан бунақа футбол ўйнаб бўлмайди. Рўзанинг охирги кунларида қийналмасдан ўтказиб олганимиздан хурсандман.

- Жамоа таркибида йўқотишлар йўқми?

- Йўқотишлар бор эди, Иброҳим Нўъмонов. Олдинги ўйинларда гол уриб ёрдам бериб турганди. Ўтган сафар “Хоразм” билан учрашувда жароҳат олиб қолди. Энг катта йўқотишимиз шу эди. Бизда 25 нафар футболчи бор. Барчаси деярли бир хил. Ўзбекистон Кубогида таркибда ротация қилиб, ёшларимизга ҳам имконият берамиз. Йўқотишларнинг ўрнини босадиган ёшларимиз бор.

- Майдон ҳақида фикрингиз?

- Майдон супер. Бундай ташкилотчиликка раҳмат айтиш керак. Шундай майдонларни ёшларимизнинг келажаги учун қилиб беришяпти. Шунақа стадионлар ҳар бир вилоятларда бўлса, “Олимпик Мобиуз”га ўхшаган жамоалар кўпроқ бўлади. Раҳмат.