Мундиал иштирокчиси биринчи ўйинга парвозда муаммога учради

Мексикадан Жаҳон чемпионати-2026'нинг Саудия Арабистонига қарши илк учрашувига йўл олиши керак бўлган Уругвай терма жамоаси чартер рейсига Флорида штатида қўнишга рухсат берилмади.

Терма жамоа учун шошилинч тарзда бошқа самолёт тайёрланди, шу боис Уругвай делегациясининг етиб келиш вақти режага нисбатан бир неча соатга кечикди.

Уругвай футбол ассоциацияси вакилларининг таъкидлашича, юзага келган муаммоларга ФИФА сабабчи бўлган. Халқаро футбол федерацияси рейс учун АҚШга парвоз рухсатномасини ўз вақтида расмийлаштирмагани айтилмоқда.

Шунингдек, вазият туфайли Уругвай терма жамоаси бош мураббийи Марсело Бьелса ва ҳимоячи Хосе Хименес иштирокидаги матбуот анжумани кейинроқ муддатга кўчирилгани маълум қилинди.