Мундиалдан қуруқ қолган ёш юлдуз аламли дил сўзларини айтди

Германия миллий терма жамоаси ва Мюнхеннинг “Бавария” клуби ярим ҳимоячиси Ленарт Карл жароҳати сабабли 2026 йилги жаҳон чемпионатида иштирок эта олмаслигини маълум қилди.

18 ёшли футболчи ижтимоий тармоқда шу ҳақида ёзди.

- Мен учун энг муҳим турнирни ўтказиб юбориш жуда оғир. Жаҳон чемпионатига тайёр бўлиш учун қўлимдан келган барча ишни қилдим. Афсуски, жароҳатлар баъзан энг ноқулай пайтда юз беради.

Германия миллий терма жамоасига омад тилайман ва ҳар дақиқа уларни қўллаб-қувватлайман. Мен янада кучлироқ бўлиб қайтаман, - деди Ленарт Карл.

Аввалроқ, Германия миллий терма жамоаси бош мураббийи Юлиан Нагельсман футболчи машғулот пайтида жароҳат олганини маълум қилган эди. Кейинчалик унда мушак толасининг узилиши аниқланди. Унинг ўрнига “РБ Лейпциг” футболчиси Ассан Уэдраого чақирилди.