"Мураббийни тактикасига тўғри келмадик шекилли, ўзим ҳам кетмоқчи бўлиб юргандим" - "Бухоро"дан кетган футболчи энди қаерга боради?

Хабарингиз бўлса, “Бухоро” сафини бир қатор ўйинчилар тарк этгани хусусида яқинда Sports.uz сайти орқали хабар бериб ўтдик.

Клубдан кетган футболчилар орасида ярим ҳимоячи Жасур Азимов ҳам бор. Иқтидорли ўйинчи бухороликлар сафига ўтган йининг ёзида бориб қўшилганди. Деярли бир йиллик фаолиятдан сўнг жамоа билан хайрлашди. Sports.uz журналисти Азимов билан алоқага чиқди.

- Жасур, “Бухоро”ни тарк этганингизни эшитдик, нима бўлди?

- Мураббийни тактикасига тўғри келмадик шекилли, жамоадан кетдик. Икки томон келишган ҳолда хайрлашдик.

- Вазият сиз учун кутилмаганда юз бердими ёки аслида ҳам воқеалар ривожи шунга қараб кетаётганмиди?

- Улуғбек Бақоев келганидан кейин битта учрашувда иштирок этдим. Кейин Ўзбекистон Кубогида “Турон”га қарши учрашувда жароҳат олдим. Шундан сўнг ўйнаганим йўқ. Ўз уйимизда “Сўғдиёна” билан учрашувдан кейин мураббийлар шунақа қарор қилишибди. Майли, уларнинг қарорини ҳурмат қиламиз. Ўзим ҳам биринчи даврадан сўнг кетмоқчи бўлиб юргандим. Фақат биринчи даврани тугатиб қўйгач, кейин кетишни ўйлагандим. Лекин улар эртароқ ҳаракат қилди, биз ҳам рози бўлдик.

- “Бухоро”да аввалига Фузайлов, кейин Бақоев ишга киришди. Аммо натижалар ўзгармаяпти. Клубга нима етишмаяпти, деб ўйлайсиз?

- Кўрган бўлсангиз, бизга Ҳаким Фузайлов пайтида бироз омад етишмади. Ҳамма учрашувда мухлисларга ёқадиган ҳужумкор футбол ўйнаётгандик. Фақат хатоимиз – вазиятлардан фойдалана олмаётганимизда эди. Шунинг эвазига жамоамизга омад етишмаётганди. Улуғбек Бақоев келгач, менимча ҳали ўзининг футболини ўйинчиларга сингдира олмади. Яна билмадим. Аммо шунақа бўлса керак. Биз у сўраётган нарсани эплай олмаяпмиз.

- Аслида мураббий ўзгариши тўғри бўлди, деган фикрдамисиз?

- Мураббий ўзгариши тўғри ёки нотўғри бўлганини натижа айтиб туради. Натижа яхши бўлса, қилинган ўзгариш тўғри бўлган бўлади. Агар натижа кўнгилдагидек чиқмаса бу ўзгариш хато қилинган ҳисобланади. Буни раҳбарият ҳал қилади. Биз оддий футболчимиз, ҳеч нарса дея олмаймиз. Раҳбарият ким билан деса ўша мураббий билан ишлаймиз. Менимча, “Бухоро” жамоаси бу йил Суперлигада қолади. Иккинчи даврада Худо хоҳласа, жамоа ўз ўйинини йўлга қўйиб олса керак. Бунга вақт керак. “Бухоро”га омад тилаб қоламан. Мухлислари доим соғ-саломат бўлишсин.

- Жасур, кейинги режангиз қандай? Олдингизда янги вариантлар борми?

- Ҳозир ўз уйимда Самарқандда “Динамо” жамоаси билан шуғулланиб турибман. Вадим Абрамовга мени жамоа билан бирга машғулотларда иштирок этишимга шароит яратиб бергани учун раҳмат. “Динамо”да спорт формамни ушлаб турибман. Вариантлар бор, ўзимиздан ҳам, четдан ҳам. Насиб қилса, бирор-бир клубда кўриниш берамиз.

- Қайси мамлакатлардан қизиқишлар бўляпти?

- Асосан шарқ давлатлари - Малайзия, Индонезия, Бангладешдан вариантлар бор. Агентлар сўрашяпти.

- Ўзингизга қолса, ёзда Суперлигада қолмоқчимисиз ёки кетганим яхши деб ҳисоблайсизми?

- Ниятим ўзимга қолса, фаолиятимни Суперлигамизда давом эттирмоқчиман. Келаси йилдан легионерга айланмоқчиман.

Шуҳратбек Жўраев.