Муроджон Аҳмадалиев: Мен Иноуэ шу кунгача жанг қилган рақибларига қараганда ақллироқ, яхшироқ ва кучлироқман!

Биринчи ярим енгил вазн тоифасида собиқ WBA ва IBF йўналишлари чемпиони Муроджон Аҳмадалиев мутлақ жаҳон чемпион бўлиш истагини билдирди.

Яқиндагина даъвогарлар жангида мексикалик рақиби Кевин Гонсалесни техник нокаутга учратиб, рақибига фаолиятидаги илк мағлубиятни тақдим этган Аҳмадалиев ушбу вазнда мутлақ жаҳон чемпионига айланиб олган Наоя Иноуэ билан жанг қилишга тайёрлигини айтди.

"Инша Аллоҳ, бу буюк жанг бўлади! Иноуэ — ўз ишининг ҳақиқий устаси! Лекин мен у шу кунгача жанг қилган рақибларига қараганда ақллироқ, яхшироқ ва кучлироқман! Чемпион, кел жанг қиламиз!", - дея Наояни рингга чорлаган Аҳмадалиев.

Манба: Ўзбекистон профессионал бокс федерацияси.