Муроджон Аҳмадалиев ва Марлон Тапалес жанг олдидан ўз фикрларини билдириб ўтди

Профессионал бокснинг биринчи ярим енгил вазн тоифасида (55,3 кг) WBА ва IBF камарлари эгаси Муроджон Аҳмадалиев 8 апрель куни Техас штати, Сан Антонио шаҳрида Марлон Тапалесга қарши рингга кўтарилиши расман тасдиқланди. Matchroom промоутерлик компанияси томонидан ўтказиладиган, кечанинг иккинчи асосий жанги бўладиган ушбу тўқнашув олдидан боксчилар ўз фикрлари билан ўртоқлашди.

 

"Мен рингга қайтаётганимдан ҳурсандман. Бу бироз чўзилди, аммо биз ниҳоят Тапалесдек ажойиб жангчига қарши қизиқарли қарама-қаршилик олдида турибмиз. У собиқ жаҳон чемпиони, бизнинг услубларимиз ўхшаш, шунинг учун, мен 8 апрелдаги қийин баҳсга тайёргарлик кўряпман",-деди Аҳмадалиев. 

 

Марлон Тапалес ҳам чемпионлик камарларини тортиб олиш иштиёқида эканлигини яшириб ўтирмади. 

 

"Мен бир эмас иккита жаҳон чемпионлик камари учун жангга эришганимдан мамнунман. Яна жаҳон чемпиони бўлиш менинг орзуйим. Мен ушбу имкониятни яратиб берган жамоам "Sanman Boxing", "Knucklehead Boxing", "Shapiro Sports", "Viva Promotions" вa "TGB Promotions"га миннаддорчилик билдираман. Мен IBF ва WBА камарларини ютиб олганимда, Филиппинга фахр ва муваффақиятни олиб қайтаман",-деди Тапалес.