МЮни сотиб олишга Конор МакГрегорнинг қурби етадими?

Мухлислар билан муносабати ёмонлашган Глэйзерлар оиласи “Манчестер Юнайтед”ни сотиб юбориши кутилмоқда. Бу хабарлар чиқа бошлагач,  UFC юлдузи Конор МакГрегор “Манчестер Юнайтед”ни сотиб олиш ҳақида ўйлаётганини маълум қилди.

Унинг бу баёноти қизғин мунозараларга сабаб бўлмоқда.

Daily Express нашри ирландиялик жангчининг Англиянинг энг машҳур клубларидан бирини харид қилиш имкониятини ўрганиб чиқди.

- Конор МакГрегор бир кун келиб, “Юнайтед”нинг директорлар кенгашида ўз жойи бўлишини орзу қилаётган бўлса-да, бунинг ҳеч қандай имконияти йўқ. 32 ёшли спортчининг бойлиги 181 миллион фунтга баҳоланмоқда. Бу сумма “Манчестер Юнайтед”дек суперклубга эгалик қилиш учун жуда кам ҳисобланади.

Яқинда Forbes мутахассислари “Манчестер Юнайтед”ни 3 миллиард долларга баҳолаган эди. МЮ жаҳоннинг энг бой клублари рейтингида “Реал” ва “Барса”дан кейин учинчи ўринда қайд этилган. Конор 20 марта лотереядан ютиб, етарли маблағ жамғарганида ҳам Глэйзерлар клубни унга сотиши амримаҳол, - деб ёзмоқда Daily Express нашри.