"Насаф" катта мураббийи: Чемпионатни ўзимизнинг футболчилар билан якунлашимиз ҳам мумкин
Хабарингиз бор бугун Суперлиганинг 13-турида “Насаф” ўз майдонида “Сурхон”ни қабул қилди ва 2:0 ҳисобида ғалаба қозонди.
Воҳа дербисидан сўнг ўтказилган матбуот анжуманида дастлаб мезбонлар катта мураббийи Шуҳрат Тошпўлатов иштирок этди ва ўйин ҳақидаги фикрларини билдириб ўтди.
- Авваламбор “Насаф” мухлисларини бугунги ғалаба билан табриклайман. Ўйин ҳақида гапирадиган бўлсам, “Сурхон” жамоасида тажрибали футболчилар йиғилганини ва жамоа кучли эканини билардик. Шу боис ушбу ўйинга жиддий тайёргарлик кўрдик.
Ўйин давомида кўплаб голга тортадиган вазиятларни яратдик, аммо биринчин бўлимда улардан унумли фойдалана олмадик. Бироқ танаффусдан сўнг Рўзиқул Бердиевдан керакли кўрсатмаларни олган футболчиларимиз ишончли ғалабани қўлга киритишди.
- Бобур Абдуҳолиқов ўйин давомида кўплаб голли вазиятларни қўлдан бой берди. У сўнгги пайтларда гол ура олмаяпти буни қандай баҳолайсиз?
- Менимча Бобурга озроқ совуққонлик етишмаяпти. Бу ҳужумчиларга ҳос вақтинчалик ҳолат деб ўйлайман. Насиб бўлса у келгуси учрашувларда голлар уриб, албатта мухлисларни хурсанд қилади.
- Мана биринчи давра ҳам якунланди. Иккинчи даврада жамоада қандай ўзгаришлар бўлиши мумкин?
- Аввал олдинда кутиб турган Лига кубогининг 2- ва 3-тур учрашувларини ўтказиб олайлик. Кейин кўрамиз. Балким янги футболчилар келар, балким ўзимизнинг футболчилар билан мавсумни якунлармиз. Бу саволга аниқ жавоб бера олмайман.
Фикрлар