"Навбаҳор" мухлисларига уйми, сафарми фарқи йўқ

10 - 11 май кунлари Суперлиганинг 8-тури ўтказилди. Натижалар билан сайтимиз орқали хабар бериб бордик.

Энди эса турга оид қизиқарли маълумотларни тақдим этмоқдамиз. Яъни анъанамизга содиқ қолган ҳолда тур мухлислари статистикаси билан таништирамиз.

Бу гал стадионларимизга жами 17336 томошабин ташриф буюрди (Бу ўтган тур билан солиштирганда 3 баробар кам). Ҳар бир беллашувга ўртача 2477ни ташкил қилади.

Энг кўп мухлис Самарқандда. “Динамо” – “Навбаҳор” баҳсини 7507 одам шоҳидига айланди. Учрашув аввалидан мазкур баҳсга янада кўп томошабин ташриф буюришини кутилаётганди. Бироқ... Шуни ҳам айтиш керакки Наманагандан Самарқандга кўплаб ишқибозлар ташриф буюрган ва ўз жамоасини стадиондан қўллаб-қувватлаган.

Турнинг марказий қарама-қаршилиги "Сўғдиёна" - "Насаф" ўртасида кечди. Кескин курашларга бой беллашувни 4083 ишқибоз томоша қилди. Бу 8-турдаги энг яхши иккинчи кўрсаткич. Ҳа айтганча, наманганликлар Самарқанддан қайтишда эртаси куни Жиззахдаги ушбу учрашувга ҳам кириб, қаршиликлар билан битта секторда "Насаф"га мухлислик қилишган.

Энг кам ишқибоз Олмалиқда. "Қизилқум" стадиони билан боғлиқ масалалар туфайли Олмалиқда уй ўйинларини ўтказмоқда. Буни қаранг-ки, навоийликлар бу тур АГМК билан куч синашди. Йирик ҳисоб қайд этилган баҳсда 571 ишқибоз стадионга ташриф буюрди.

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

"Динамо" - "Навбаҳор" 0:1. 7507 томошабин

"Сўғдиёна" - "Насаф" 1:2. 4083 томошабин

"Бунёдкор" - "Металлург" 1:1. 2400 томошабин

"Пахтакор" - "Сурхон" 2:2. 1122 томошабин

"Нефтчи" - "Олимпик" 0:0. 861 томошабин

"Локомотив" - "Қўқон-1912" 1:2. 792 томошабин

"Қизилқум" - АГМК 1:4. 571 томошабин