"Навбаҳор" ОЧЛда яхши натижа кўрсата олади, мавсум тугаши билан "Нефтчи" алоқага чиқди" - Нурилло Тўхтасинов нима сабабдан жамоасини ўзгартирганини биласизми?

Иқтидорли ярим ҳимоячи Нурилло Тўхтасинов бу йилги чемпионат ниҳоясига етганидан сўнг клубини ўзгартирганидан хабарингиз бўлса керак.

Андижонлик футболчи “Навбаҳор” сафида тўлиқ мавсумни ўтказди. Лекин у ерда ўзи истаган даражада ўйин амалиётига эга бўлгани йўқ.

Келаси йилги мавсумни эса Тўхтасинов Фарғонанинг “Нефтчи” жамоасида ўтказади. Sports.uz журналисти футболчига бир қанча саволлар билан мурожаат қилди.

- Нурилло, чемпионат тугаши биланоқ “Навбаҳор” билан хайрлашиб, “Нефтчи” клуби аъзосига айландингиз. Расман шартнома тузганингиз эълон қилинди. Нега ҳаммаси бунчалик тез содир бўлди?

- Авваламбор, барчага ассалому алайкум! Мавсум тугаши биланоқ “Нефтчи” клубидагилар мен билан алоқага чиқишди. Яхши таклифни ўртага ташладилар. Бу эса менга маъқул келди.

- Бир йил мобайнида “Навбаҳор”да ўйнадингиз. Аммо, адашмасам, иккинчи даврада захирада қолиб кетдингиз. Ўзи, нима бўлди?

- Бу йил “Навбаҳор” жамоасида жуда яхши ўйинчилар йиғилди. Шунга мос равишда у ерда ажойиб жамоа шаклланганди. Иккинчи даврада мени нима сабабдан ўйинларга қўймаганини билмадим. Рости, ўйнамаганимнинг сабаби нимада эканини ўзим ҳам билмайман.

- “Навбаҳор”га ўтишдан олдин сизда легионер сифатида четда тўп суриш имкони ҳам бўлганди. Бу имкониятдан фойдаланмаганингиз сиз учун яхшиликка бўлдими ёки...

- Албатта, менга “Навбаҳор”дан илгари хориждан таклифлар бўлгани рост. Лекин наманганликлар сафига ўтганимдан афсусланмайман. Худо хоҳласа, ҳаммаси олдинда, барчаси яхшиликка бўлади.

- “Нефтчи” ва “Навбаҳор” доим принципиал рақиблар. Сиз энди Фарғонада ўйнайсиз. “Навбаҳор”дан нимаси билан фарқ қилади, деб ўйлайсиз?

- “Навбаҳор”нинг ҳам, “Нефтчи”нинг ҳам ўз ўйин услублари бор. Иккала жамоа ҳужумкор ўйин кўрсатади.

- Собиқ клубингизга айланган “Навбаҳор” Осиё Чемпионлар лигасида қатнашади. Жамоанинг имкониятини қандай баҳолайсиз?

- Шуни аниқ айтаманки, “Навбаҳор” клуби Осиё Чемпионлар лигасида яхши натижа кўрсата олади. Худо хоҳласа, жамоанинг бунга имконияти етарли.

- “Навбаҳор”да футболчи сифатида ўсдим деб ўйлайсизми ёки аксинчами?

- “Навбаҳор”да футболчи сифатида ўсмадим, деб ўйлайман. Чунки иккинчи даврада майдонга кам тушдим. Худо хоҳласа, “Нефтчи” жамоасида яхши ўйинлар кўрсатаман, деб умид қиламан.

- “Нефтчи”да ўзингиз учун қайси рақамни танладингиз?

- Ҳали рақам танламадим.

- “Нефтчи”нинг янги мавсумдаги мақсади жиддийми ва бош мураббий Виталий Левченко билан илк суҳбат қандай ўтди?

- “Нефтчи”нинг янги мавсумдаги мақсади катта. Худо хоҳласа, медаллар учун ҳаракат қиламиз. Мураббий билан режалар ва янги мақсадлар ҳақида гаплашдик.

Шуҳратбек Жўраев.