"Навбаҳор" вице-президенти Отабек Саматовнинг хатти-ҳаракатлари тартиб-интизом қўмитаси томонидан кўриб чиқилади

“Навбаҳор” футбол клуби вице-президенти Отабек Саматов Суперлига 19-туридан жой олган “Андижон”га қарши учрашув якунида номақбул ҳатти-ҳаракатларни амалга оширган. Лига комиссарининг билдиргиси асосида унинг иши ЎФА Тартиб-интизом қўмитасига оширилади.

Андижондаги “Бобур арена” стадионида бўлиб ўтган учрашув якунида меҳмонлар вице-президенти Лига комиссарининг огоҳлантиришига қарамай, учрашув расмийлари кўз ўнгида нотўғри ҳатти-ҳаракатларни амалга оширган. Шундан келиб чиқиб, бугун бўлиб ўтадиган “Навбаҳор” — “Турон” ўйини вақтида Отабек Саматов техник зонага киритилмайди.

Маълумот учун, Отабек Саматовга нисбатан ЎФА Тартиб-интизом қўмитасининг 2023-йил 21-июлдаги қарори асосида учрашув расмийларига нисбатан ҳақоратли сўзлар ишлатгани учун жарима интизом чораси қўлланилганди.