"Навбаҳор"га қарши ўйинда "Металлург"га нима етишмади? - Мураббий жавоб берди

Coca Cola Суперлигасининг 6-туридан ўрин олган "Металлург" - "Навбаҳор" (1:3) учрашувидан кейин мезбонлар бош мураббийи Андрей Шипилов ўз фикрларини билдирди. Бу ҳақда клуб матбуот хизмати хабар берди.

- Рестартдан кейин бугун куч синашган жамоаларнинг иккаласи ҳам очко жамғараётганди. Шу боисдан ҳам кайфиятлар аъло эди. Ўйиндан олдин оптимистик кайфиятда эдик. Афсуски, Наманган жамоаси ўзи яратган барча вазиятларни голга айлантирди. Бизнинг йигитларда эса ғалабага чанқоқликни сезмадим. Хоҳиш ва интилиш кучли бўлмади. Марказда оддий элементар хатоларга йўл қўйдик.

Ҳозир қайноқ ҳароратда ва ҳиссиёт билан бирон бир нарса дейиш қийин. Эртага хотиржам футболчиларнинг ҳаракатларини таҳлил қилиб чиқамиз. Хатоларни кўриб хулоса чиқарамиз. Уйда мағлубиятга учраш доим ёқимсиз ва хунук. Ҳа, биз мағлуб бўлдик. Буни тан оламиз. "Навбаҳор"ни ғалаба билан табриклайман. Футболчилар ва мураббийлар профессионал ишлашди.

Бугун турнир жадвалидан келиб чиқиб гапирадиган бўлсак олтинчи турнинг марказий ўйини бўлди. Акбар Исматуллаевга эътирозим йўқ. У ўз даражасида ўйнамоқда.

Журналистларни касб байрами билан табриклайман. Ўз ишларининг профессионаллари бўлишини тилайман. Маълумот ва хабарларни етказиб беришда уларнинг ўрни беқиёс, - деди Андрей Шипилов.