"Навбаҳор"ни ким "жарга итарди?"

Мен қашқадарёлик эмасман, шунинг учун "Насаф"га симпатиям йўқ. Тошкентлик ҳам эмасман, "Пахтакор", "Бунёдкор" ёки "Локо"дан бирининг ғалабаси мени бошқалардан кўпроқ қувонтирмайди. Хўш, нима қилибди? Буни шунчаки маълумот ўрнида қабул қилиб қўярсиз.

Гапнинг индаллосига ўтсак, "Навбаҳор" жуда ва жуда қулай имкониятни қўлдан чиқарди. 20-тур доирасида ўзаро тўқнаш келадиган "Пахтакор" ва "Насаф" дурангга имзо чекса-ку, кўп нарса ўзгармаслиги мумкин, аммо рақобатчилардан бири ғалаба қозонса, наманганликларга "оғиридан келади". Ҳозир бу қандай содир бўлганини таҳлил қилиб кўрамиз. Аслида "Навбаҳор"ни ким "жарга итарди?"

1-вариант — ҳакамлар!

Танташев ўйинни шундай бошқарди-ки, унга эътироз билдирмаган инсон қолмади. Мана бу вазиятни наманганликлар ҳали узоқ гапириши аниқ. Энг қизиғи, рефери видеотакрорларни нега кўрмаганини ҳамон тушуна олмаяпман.

Менимча, қўл у қадар табиий ҳолатда эмасди. Табиий ҳолатда ҳам дейлик, лекин тўп Марушич манзили томон яхши тезликда кетаётган, Зоран бир ҳаракат билан уни дарвозага тўғирлаб юбориши мумкин эди. Вазият энг камида ВАРни кўриш учун етарли деган фикримда қоламан!

Бўлдими? Фақат шуми? ЙЎҚ! Арбитр "лочинлар" фойдасига ҳам битта шу каби қарор қабул қилди. Кўпчилик сезмадику, аммо қўшиб берилган дақиқаларнинг тўққизинчисида Раҳмоналиев меҳмонлар жарима майдони ичида йиқилди. Ҳакамнинг қарори - пенальти йўқ! Бу ҳалиги тўп Ёқубовнинг қўлига теккан вазиятга анча ўхшаб кетарди. Балки Танташев ВАРдаги ёрдамчиларига шунчалик ишонар, балки 5 та камера ҳолатга тўлиқ ойдинлик киритиб бера олмаслиги ўз сўзини айтгандир...

2-вариант — "Бунёдкор!"

Баҳс атрофидаги жуда кўпчилик битта гапни айтмоқда: "Бунёдкор" мактаб ўқувчилари билан ютиб кетди". Дарҳақиқат, Бошкович майдонга ташлаган футболчиларнинг кўпчилиги ҳали жуда ёш. Лекин шу болалар акаларига қўшилиб ўз бўйидан баландроқ сакради. Балки улардан бирортаси фантастик ўйин кўрсатмагандир, аммо ёш "қалдирғочлар" сўнгги дақиқаларгача тиним билмади.

Рақиб бош мураббийи ҳам мезбонларнинг фаоллигини алоҳида таъкидлаб ўтди. Ҳа, "Жар"даги беллашувда "қалдирғочлар" "лочинлар"дан баландроқ парвоз қилди. Буни ҳатто Бабаян тан олиб турганда яна ким эътироз қиларди?!

3-вариант — "Навбаҳор"нинг ўзи!

Менимча, мағлубиятнинг энг катта сабабчиси футболчиларнинг ўзи: вазиятлардан фойдалана олмаган ҳужумчилар, мудофаада қўпол хатоларга йўл қўйган ҳимоячилар, шогирдлари чарчаб қолишининг олдини ололмаган мураббий. Эътибор берган бўлсангиз, "Навбаҳор" иккинчи бўлимда ғалаба учун етарли вазиятлар яратди. Биринчи таймда-чи? Дастлабки 45 дақиқаликда ҳаракат қилган Касьянь умуман кўринмади. Қандай қилиб чемпионлик учун курашмоқчи бўлган клуб бундай бўш тайм ўтказиши мумкин?

Хуллас, ҳозир танқид ҳеч кимга ёқмаслиги аниқ. Лекин шуни унутмангки, "Навбаҳор" жуда-жуда керакли очколарни бой берди. Чемпионат интригасини фақатгина "Пахтакор" - "Насаф" ўйинидаги дуранг қутқариб қолиши мумкин!

Жавоҳир Азимов