"Нефтчи" билан муваффақиятсизликка учраган Баҳром Ҳайдаров!

 Фарғонанинг «Нефтчи» клуби ўз тарихида илк бор про-лигага тушиб кетди ва бу йил у ерда иштирок этмоқда. Ўтган йили Суперлигада омадсиз иштирок этиши оқибатида мухлисларининг хафсаласини пир қилгани ҳам рост. Ўтган йилдан бошлаб «Нефтчи» бош мураббийи сифатида ишга киришган Баҳром Ҳайдаров яқинда ўз аризасига биноан истеъфога чиқди. Аслида ўтган йилги муваффақиятсизликка қарамасдан Ҳайдаров жамоада қолганди ва бу йил «Нефтчи»ни Суперлигага қайтариш учун ишни бошлаганди. Бироқ мавсум фарғоналиклар учун муваффақиятсиз бошланди. Ўз майдонида кетма-кет икки марта ютқазиб қўйишди. Кейин эса Баҳром Ҳайдаровнинг ишдан бўшаганлиги ҳақидаги хабарлар тарқалди. Афсуски, «Нефтчи» ушбу мураббий бошчилигида омадсизликка юз тутди. Натижада Ҳайдаров ҳаммасини бошидан бошлаб, ўзи жамоани Суперлигага қайтариш истагида юрганди. Бироқ бу истак унга насиб қилмаган кўринади. Яқинда эса унинг отаси вафот этди. Айтиш мумкинки, у ҳаётнинг турли қийинчиликларига дуч келди. Куни кеча ўзи билан мулоқотда бўлдик. Мураббий жамоадан нима учун кетгани, клубда қандай ишлагани ва яна бошқа масалаларда ўз фикрлари билан ўртоқлашди.

«Ҳаётда футболдан ҳам азизроқ нарсалар бор»

- Биз яхши ниятлар билан янги мавсумга тайёргарликни бошлагандик, - дея гап бошлади, Ҳайдаров. - Шунга яраша бир қатор Суперлигада ўйнаган футболчиларни таклиф қилдик ва улар бизнинг таклифимизга йўқ дейишмасдан «Нефтчи»га келишганди. Раҳбарият ҳам олдимизга Суперлигага қайтиш вазифасини қўйганди. Афсуски, чемпионатнинг биринчи турида «Хоразм»га ютқазиб қўйдик. Шундан кейин оиламда муаммолар бўлди. Бунинг натижасида жамоамнинг машғулотлар жараёнларида иштирок эта олмадим. Ўйлаб қарасам, бош мураббийнинг асосий иши барибир ўз жамоасида бўлиши керак. Агарда бош мураббийликдан ташқари яна бошқа иш билан шуғуллансангиз ҳам бу жамоага салбий таъсир кўрсатади. Ишингизнинг ҳам самараси бўлмайди. Оилавий шароитим шуни тақозо этдики, мен доим ҳам жамоа билан бирга бўла олмасдим. Натижада клубдагилар билан ҳаммасини маслаҳатлашдик ва уларга ўрнимга бошқа мураббий қўйинглар деб айтдим. Шундан сўнг ўз хоҳишим билан ишдан бўшаш ҳақида ариза ёздим. Лекин кўпчилик менинг қониқарсиз натижа туфайли кетди деб истеъфога чиққанимни нотўғри талқин қилишяпти. Мен бундай қарорга келиш учун кўп ўйладим. Ҳам ўзим учун, ҳам жамоам учун шундай йўл тутдим. Ҳаётда шундай ҳолатлар борки, у касбингиздан ҳам, футболдан ҳам азизроқ. Албатта, «Нефтчи»ни яхши кўраман. Бироқ мен учун бундан-да азизроқ нарсалар бор. Бу қарорга келишдан олдин эса ҳаммасини роса ўйлаб чиқдим.

«Муаммоларга қарамасдан охиригача курашдик»

- Футболчи сифатида «Нефтчи»да янада яхшироқ танилган бўлсам, мураббийликда ҳам «Нефтчи»да ном қозондим деб ўйлайман. Клубда олти йил ишлаган бўлсам, ўтган вақт давомида фақат ҳалол меҳнат қилдим. «Нефтчи» жамоасида ишлаганимдан сира ҳам афсусланмайман. Жамоа учун боримни бериб ишладим. Лекин мураббийларга жуда қийин. Кўпчилик мураббийлик касбини тушунмайди, аммо биз ҳаммасига чидашимиз керак. Футболчи сифатида ўйнаб кўплаб мураббийларнинг қийналганини кўрганмиз. Ўзим ҳам бу соҳада ишлаб кўплаб қийинчиликларни бошимдан ўтказдим. Ишқибозларга маслаҳатим бор, улар жамоадаги ички ҳолатни билмай туриб, ҳақоратлаб, танқид қилаверишлари керак эмас. Мухлис ҳамма вақт ўз жамоасини қийин пайтда ҳам қўллаб-қувватлаб туриши лозим. Ҳеч кимга яширишнинг кераги йўқ, ўтган йилги мавсумнинг ярмидан бошлаб жамоада қийинчиликлар бўлди. Айниқса, молиявий тарафдан муаммоларга дуч келдик. Бундай ҳолат «Нефтчи»нинг тарихида бўлмаганди. Биз ютқазган ўйинларимизда ҳам охиригача мардонавор курашдик деб бемалол айта оламан. Клубнинг обрўсини ўйлаб, ҳар хил қинғир ишларга аралашмадик, яъни, келишилган ўйинлардан узоқда бўлдик. Бирор марта нотўғри йўлдан юрмадик ва «Нефтчи»нинг обрўсига путур етадиган иш қилмадик. Охиригача клубни сақлаб қолишга ҳаракат қилдик. Тўғри, мавсум биз учун омадсиз кечди ва афсуски, «Нефтчи» қуйи лигага тушиб кетди. Бироқ боя айтганимдек, биз охиригача виждонан курашдик. Шунинг учун ҳар доим юзимизни тик тута оламиз.

«Нефтчи» про-лигада энг кучлиси»

- «Нефтчи» жамоаси ҳозир яхши ҳолатда. Про-лиганинг «А» гуруҳида «Нефтчи»ни энг кучли жамоа деб ҳисоблайман. Очиғи, юзим ёруғ, кўнглим хотиржам. Клубни тарк этганимдан виждоним қийналаётгани йўқ. Яхши таркибни тўплагандик. Фақат футболчиларнинг ўзлари ҳам мақсадга эришишни ич-ичларидан хоҳлашлари керак. Бунинг учун астойдил меҳнат қилишлари талаб этилади. Агар борларини бериб ўйнашса, Суперлигага чиқиш албатта уларнинг қўлидан келади. Жамоада ёш иқтидорли футболчилар билан бирга тажрибали ўйинчилар ҳам бор. Бояги айтган гапим рост, чиндан ҳам «Нефтчи» ўз гуруҳида энг кучлиси. Фақат буни амалда исботлашлари керак. Агарда клубдаги ўйинчилар масъулиятни чуқур ҳис қилиб, ўз ўйинларини кўрсатишса, ҳаттоки мураббийсиз ҳам ўйнаб мақсадга эришишлари мумкин.

«Биз «Нефтчи»да ҳалол ишладик»  

- Ўтган йили «Нефтчи»ни қабул қилиб олганимда жамоада 4 очко бор эди. Ўша пайтда менга жамоада бош мураббийлик қилишни таклиф қилишганида ҳали ёш мураббийман, кейинчалик муваффақиятсизлик бўлса, менга қандай таъсир қиларкин, деган нарсаларни ҳам ўйлаганман. Чунки бундай пайтда кўпчилик ҳатто ишни бошламай туриб қўрқади. Айниқса, ёш ва янги иш бошлаган бош мураббийлар барибир ҳайиқишади. Чунки мабодо, клуб қуйи лигага тушиб кетса, бу мураббийлик фаолиятимга таъсир кўрсатмасмикин деган хадик барибир бўлади. Лекин менда бундай нарса бўлмади. Ҳар доим қандайдир ишга қўрқмасдан қўл ураман. Ишим қийинчиликдан иборат бўладими ёки енгилликданми, буни менга фарқи йўқ. Қачондир, барибир бош мураббийликдаги ишимни бошлашим керак эди. Ҳеч ким сизга тайёр жамоани бериб қўймайди-ку, тўғрими? Очиғи, «Нефтчи» гарчи про-лигага тушиб кетган бўлса-да, у ерда ишлаб мураббий сифатида танилдим деб ўйлайман. Яна қайтараман: биз клубда ҳалол ишладик. Агар ҳалол ишласангиз ҳар доим юзингиз ёруғ бўлаверади. Мураббий ҳеч қачон ўзининг иш жойини йўқотишдан қўрқмаслиги лозим. Эртага ишдан бўшаб кетсам нима бўлади, деган қўрқувли тушунчаларни мураббий ўзларидан йўқотишлари керак. Ҳозирча мураббийликдаги ишларимни ўйлаб, таҳлил қиляпман.