"Нефтчи"да ҳам, "Андижон"да ҳам тўп сурган собиқ футболчилар қайси томоннинг ғалабасини хоҳлашмоқда?

Ниҳоят, ПФЛ томонидан “Нефтчи” – “Андижон” иштирокидаги плей-офф баҳси қачон ўтказилиши маълум қилинди. Унга кўра, бу ўйин 15 декабрь куни ўша “Истиқлол” стадионида бўлиб ўтади. Фақат учрашув мухлисларсиз ташкил этилади. Бу битта ўйиндан иборат бўлади ва ғолиб жамоа келаси йили Суперлигада қатнашади.

Хабарингиз бор, “Нефтчи” клуби аслида про-лига пешқадами сифатида Суперлигага жуда яқин келганди. Бироқ охирги иккита учрашувда ютқазди. Ҳолбуки, уларни бир очко ҳам қониқтирарди. Аммо оғзидаги ошни олдириб қўйди. Устига-устак “Турон”га қарши ўйинда юз берган воқеалар сабабли ЎФА клубни жазолади. Айни пайтда жамоада бир қатор муаммолар бор. Масалан, ЎФА беш нафар футболчисини дисквалификация қилганидан хабардорсиз. Улардан уч нафари асосий таркиб футболчиси эди. Бунинг устига жамоага 100 миллион сўм миқдорида жарима ҳам белгиланди. Бош мураббий эса истеъфога чиқарилган.

Айни пайтда клуб мана шундай қийинчиликлар билан ўйинга тайёргарлик кўрмоқда. Бироқ бу водий дербиси бўлиб, бунда жамоалар ҳар қандай ҳолатда ҳам ғалаба учун охиригача курашишади. Хуллас, мазкур ўйинга қизиқиш катта. Эътиборлиси, “Нефтчи”да ҳам,” Андижон”да тўп сурган таниқли собиқ футболчилар бир талай. Улар sports.uzга жамоаларнинг имкониятлари борасида ўз фикрларини билдирдилар.  

Баҳром Ҳайдаров: “Натижа қандай бўлишини билмайману, аммо тенгма-тенг ўйин бўлади”

- Биринчидан, бу битта ўйиндан иборат. “Нефтчи”нинг про-лига, “Андижон” бўлса, Суперлига жамоаси эканини эсдан чиқаришимиз керак. Ушбу қарама-қаршилик фақат битта беллашувдан иборатлиги ҳисобига жамоалар бир хил вазиятда. Тўғри, “Андижон” Суперлиганинг, “Нефтчи” эса про-лиганинг савиясида иштирок этишди. Лекин боя айтганимдек, битта учрашувга бу нарсалар таъсир қилмаслиги мумкин. Одатда, бундай жамоалар тўқнаш келганида, уларнинг қайси лигада, қайси ўриндалиги ва қандай футболчилар тўп сураётганининг фарқи йўқ. Натижа қандай бўлишини билмайману, лекин тенгма-тенг ўйин бўлса керак. Ахир бу дерби! “Андижон” Суперлигада пастки қаторларга тушиб кетгани учун ўзини бу учрашувда ўзини оқлашга ҳаракат қилади. “Нефтчи” жамоаси эса иккита ўйинда бир очко олса бўлгани эди. Қўлида турган тайёр имкониятни йўқотгани учун мухлислар олдида футболчилар яна ўзини исботлаши учун бор кучини ишга соладилар. Тўғриси, иккала клубда ҳам тўп сурганман. Бундай пайтда бирортасига жиддий мухлислик қилишим қийин. Аслида иккала клубни ҳам Суперлигада кўрсам яхши бўларди. Бироқ фарғоналик бўлганим учун барибир ўша куни “Нефтчи”га ишқибозлик қиламан. Имкониятларни 50х50 баҳолайман.

Шерзод Райимжонов: “Фарғоналик сифатида “Нефтчи”га мухлислик қиламан, лекин...”

- Юз берган воқеаларни бир четга суриб, футбол ичидаги инсон сифатида айтадиган бўлсам, аввало учрашув мухлисларсиз ўтади. Ўзим “Нефтчи”да 10 йил тўп сурдим ва Райимжонов сифатида танилдим. Боз устига фарғоналикман. Шу боис табиийки, “Нефтчи”нинг Суперлигага қайтишини истайман. Айни пайтда фарғоналик мухлислар юз берган ишлардан азият чекишяпти. Шуни ҳисобга олганда, ишқибоз сифатида “Нефтчи”га мухлислик қиламан. Лекин деган жойи бор. Чунки Суперлига билан про-лига ўртасида тафовут бор. Бир нечта факторлар мавжуд. “Нефтчи” ўз уйида ўйнагани билан мухлисларисиз ҳаракат қилади. Бу дегани 12-ўйинчисиз. Фақат футбол принциплари бўйича ўйин бўлади. “Андижон” 13-ўринни эгаллаган бўлса ҳам улар Суперлигада қатнашди. “Нефтчи”нинг про-лигадаги рақибларига ҳурматни сақлаган ҳолда айтиш мумкинки, “Андижон” жамоаси охирги расмий беллашувларда “Насаф”, “Пахтакор”, “Қўқон-1912” каби рақиблар билан беллашди. Футбол фактори билан қарайдиган бўлсак, “Андижон”да имконият юқорироқ. Чунки бу клуб Суперлига иштирокчиси. Умуман олганда, бу учрашувни орзиқиб кутяпман. Ажойиб дерби бўлади. “Нефтчи”нинг минус томонини ўз майдонида ўйнаётгани ёпиб юборади, “Андижон”нинг эса сафарда ўйнаётганини унинг савияси ёпади. Лекин бир жиҳатдан хурсандманки, ўзбек футболига водий футболи ҳалолликни кўрсатиб қўйди. Нега деганда, “Нефтчи” – “Турон” ўртасидаги беллашувдан аввал турли гап-сўзлар кўпайиб кетганди. Бунга жавобан бутун Ўзбекистон ушбу ўйиннинг қандай ҳалоллик остида ўтганини кўрди. “Нефтчи” – “Андижон” баҳсида ҳам ана шундай ҳалол ўйинни кўрамиз, дея ишонаман. Иккала жамоанинг имкониятини тенг баҳолайман.

Акмал Холматов: “Ким кучли бўлса, ўша ютсин”

- Тўғриси, чиройли футбол тарафдориман. “Нефтчи” ютадими ёки “Андижон”ми, муҳими яхши ўйин бўлсин. Ким кучли бўлса, ўша ютсин. Тўғри, Холматов сифатида “Нефтчи”да танилдим. Шундай экан, ушбу жамоага ҳайрихоҳман. Лекин футболнинг ўз принципи бор: ким кучли бўлса, ўша ютсин. Ўтган ишлар ўтиб кетди. Энди бундай салбий ҳолатлар бўлмасин. “Андижон”нинг “Насаф” билан ўйинини кўрдим. Майдоннинг сифатсиз эканини ҳисобга олсак, “Андижон” яхшироқ ўйин намойиш этди. Ҳар бир учрашув ўзига хос янгилик бўлади. Масалан, кеча яхши ўйин кўрсатган бўлсангиз, бугун бунинг акси бўлиши мумкин. 15 декабрь куни иккала жамоага ҳам омад тилайман. Кимда хоҳиш ва тайёргарлик яхши бўлса, ўша жамоа ютади, деб ўйлайман. Мен ҳам, сиз ҳам футболнинг тарафдоримиз.

Абдумажид Тоиров: “Андижон”нинг имконияти баланд”

- “Нефтчи” ўз майдонида ўйнайди. Аммо охирги воқеаларни ҳисобга оладиган бўлсак, бу жамоада катта муаммолар бор, таркиб, руҳий тайёргарлик, мураббий масалаларида. Шуни ҳам айтиш керакки, ҳар бир жамоа ўзи иштирок этаётган мусобақадан келиб чиқиб вазифа қўяди. “Нефтчи”нинг таркиби про-лиганикига мос. “Андижон” эса Суперлигада 13-ўринни эгаллагани билан унинг таркиби ва имконияти баланд. Ўйлашимча, ўша учрашувда 60х40 “Андижон” фойдасига баҳолайман. “Нефтчи”нинг ҳозирги ҳолатини ҳисобга олганда барибир андижонликларнинг имконияти юқори. Лекин яхши ўйин бўлади. Ҳар доим водий жамоалари иштирокидаги учрашувлар жуда муросасиз ўтади. Мен бу ўйинни кутаман. Агар имкониятим бўлса, Шерзод Райимжонов, Баҳром Ҳайдаров ва бошқа дўстларимиз билан ўйинни стадионда кўрмоқчиман. Эшитишимча, стадионга мухлислар киритилмайди. Менда эса ЎФА томонидан берилган рухсатнома бор. Қолаверса, мен “Пахтакор” селекционериман. Шунинг учун бу дербини кузатиш жуда қизиқ. Футбол эҳтирослар ўйини. Ишонаманки, ажойиб учрашув бўлади. “Нефтчи”нинг айрим ўйинларини кузатдим. Менга керакли футболчилар бу клубда тўп сураётгани учун томоша қилдим. “Турон”ни ҳам синчковлик билан кузатдим. “Андижон”нинг таркибини ҳам биламан, ким қандай кучга эгалиги борасида тасаввурим бор.

Анвар Бердиев: “Плей-оффда ҳамма нарса бўлиши мумкин”

- Дерби доим ўз номи билан дерби. Бунда жамоаларнинг қайси ўриндалигини фарқи йўқ. Ўзим ҳам футболчи сифатида кўплаб бундай дербиларда қатнашганман. Биласизми, майдонда ўзингиз кутмаган ҳолатлар бўлиши мумкин. “Нефтчи”да ҳам, “Андижон”да ҳам имконият яхши. Биласиз, узоқ йиллар давомида “Нефтчи” шарафини ҳимоя қилганман. Агар “Андижон” плей-оффда “Нефтчи” эмас, балки бошқа жамоа билан ўйнаганида андижонликларга мухлислик қилардим. Албатта, ушбу клубда тўп сурганман. Озми-кўпми, ашаддий мухлислари билан танишганман. Уларни ҳеч қачон ёдимдан чиқармайман. Бу жамоа ишқибозларининг Ўзбекистонда ўз ўрни бор. Уларга ўзимнинг саломимни йўлламоқчиман. Фақат вазият шундай бўлиб қолдики, “Андижон” плей-оффда “Нефтчи”га қарши тўп суради. Албатта, кучлиси ютишини истайман. Бироқ фаолиятимнинг кўп қисмини Фарғонада ўтказганим боис “Нефтчи” жамоасига мухлислик қиламан. Лекин шуни унутмаслик керакки, бу битта ўйиндан иборат бўлади, имкониятлар эса тенг. Ҳамма нарса бўлиши мумкин. Кўп нарса тайёргарликка боғлиқ. Хоҳлаймизми-йўқми, Суперлига билан про-лиганинг фарқи бор. “Андижон”нинг кубок доирасида “Насаф”га қарши ўйинини телевизор орқали кўрдим. Ўша куни майдон эгалари яхши ўйин кўрсатди, менга ёқди. Яна қайтараман: плей-офф баҳсида ҳар нарса бўлиши мумкин.