Неймар йил охиригача фаолиятини якунлаши мумкинлигини маълум қилди

"Сантос" ҳужумчиси Неймар келаётган декабрь ойида профессионал фаолиятини якунлаши мумкинлигини истисно қилмади.

"Бундан кейин нима бўлишини билмайман, балки декабрь ойида фаолиятимни якунларман, юрагим нима дейишини кўрамиз", - деди Неймар Cazé TV телеканалига берган интервьюсида.

34 ёшли ҳужумчи "Сантос" сафида 2025 йилнинг январидан буён тўп суриб келмоқда. Футболчининг клуб билан амалдаги меҳнат шартномаси 2026 йил охиригача мўлжалланган.

Неймар "Сантос" тарбияланувчиси ҳисобланади. Сан-Паулу клубидаги фаолияти давомида Неймар барча мусобақаларда 254 та ўйин ўтказиб, 147 та гол ва 71 та голли узатмани амалга оширган. Transfermarkt порталида келтирилган маълумотларга кўра, футболчининг бозор нархи 10 млн еврони ташкил этади.