Ниҳоят, "Пахтакор" стадионида гавжумлик, "Металлург"нинг ўйини мухлисларга қизиқ эмасми ёхуд тур ишқибозлари хусусида

Суперлиганинг 24-тури 1-4 ноябрь кунлари ўтказилди. Турнинг охирги учрашуви 11 ноябрда бўлиб ўтади. Унгача 6 та беллашувга гувоҳ бўлдик. Ҳар бир турда ишқибозларнинг ташрифи алоҳида ҳисоб-китоб қилинади. Тўғри, “Навбаҳор” -“Бунёдкор” ўйини орқали тур якунига етади. Лекин биз унгача юқоридаги 6 та жуфтликка тўхталиб, стадионлардаги томошабинлар ташрифи хусусида сўз юритмоқчимиз.

Доимгидек, қайсидир учрашувда кўпроқ, яна қайсидир ўйинда камроқ мухлисларнинг ташрифи кузатилди. Турнинг марказий учрашуви шубҳасиз “Пахтакор” – “Насаф” ўртасидаги қарама-қаршилик билан боғлиқ эди. Чемпионлик учун курашаётган ушбу иккала жамоа ўйини дарҳақиқат барчанинг жиддий қизиқишларига сабаб эди. Буни томошабинлар ташрифидан ҳам билса бўлади. Гарчи муҳташам “Пахтакор” стадиони ишқибозлар билан тўлмаган бўлса-да, анчадан бери 10 мингдан зиёд мухлиснинг ташрифи кузатилмаётганди. Бу сафар “Насаф”га қарши учрашувни стадионда 12365 нафар ишқибоз кузатиб борди. Уларнинг орасида “Пахтакор”дан ташқари Қашқадарёдан келган “Насаф” мухлислари ҳам бор эди.

Фарғонадаги “Истиқлол” стадионида бўлиб ўтган “Нефтчи” – “Олимпик” баҳсига 7000 га яқин ишқибоз келди. Аниқроғи рақамлар 6821 нафарни ташкил қилди. Бу борада энг кўп томошабин йиғиш бўйича “Нефтчи” “Пахтакор”дан кейин бу турда иккинчи ўринда қайд этилди. Аслида эса бу рақам фарғоналиклар учун пасайиш ўрнида қабул қилинди. Чунки бунгача “Истиқлол” стадиони камида 10 мингдан зиёд мухлислар билан гавжум бўлаётганди. Ишқибозлар ташрифининг пасайишини “Нефтчи”нинг охирги пайтларда рақибларига имкониятни бой бераётгани, очколар йўқотаётгани билан изоҳлаш мумкин.

24-турда энг кам мухлис Олмалиқдаги стадионда қайд этилди. “Металлург” – “Сурхон” ўртасидаги ўйин ишқибозларда жиддий қизиқиш уйғотмади, деб ҳисобласак бўлаверади. Боиси, стадионда бор йўғи, 423 ишқибоз жам бўлди, холос. Аксига олиб “Металлург” кам сонли мухлислари қаршисида рақибига ютқазиб қўйди. Бундан ташқари, Жиззахда “Сўғдиёна” – “Бухоро” беллашуви ҳам катта қизиқишларга сабаб бўлмади. Стадионда 969 нафар ишқибоз жам бўлди ва 1000 тага ҳам етгани йўқ. Балки жиззахликларнинг кетма-кет мағлубиятлари ишқибозларнинг хафсаласини пир қилгандир. Аммо шу куни “Сўғдиёна” мағлубиятсиз сериясига нуқта қўйди.

“Навбаҳор” – “Бунёдкор” учрашувини ҳисобга олмаганда 24-турнинг олтита ўйинини стадионларда ҳаммаси бўлиб 23874 ишқибоз кузатиб борди.

Тур мухлисларининг ташрифи 

ОКМК – “Турон” – 2:1. 1235 томошабин

“Қизилқум” – “Андижон” – 3:0. 2061 томошабин

“Пахтакор” – “Насаф” – 1:1. 12365 томошабин

“Нефтчи” – “Олимпик” – 0:1. 6821 томошабин

“Металлург” – “Сурхон” – 0:1. 423 томошабин

“Сўғдиёна” – “Бухоро” – 1:0. 969 томошабин