Нўъмон Ҳасанов "Хўжанд"даги талаби ва мақсади ҳақида нималарни айтди?
Хабарингиз бор, яқинда Тожикистоннинг “Хўжанд” жамоасида бош мураббий ўзгарди ва бунинг биз учун эътиборга молик жиҳати бор. Бир неча йил давомида клубга устозлик қилган Рустам Ходжаев истеъфога чиқди. Унинг ўрнини ҳамюртимиз Нўъмон Ҳасанов эгаллади.
Нўъмон Нурматовични бу Тожикистондаги илк иш фаолияти эмас. Билсангиз, ўтган йилнинг ярмида “Истаравшан” жамоасининг бошқарувини ўз қўлига олганди. Лекин ўшанда унинг жамоаси омадсизликка юз тутиб, кучлилар сафини тарк этган. Бироқ бу ҳолат Ҳасановнинг мураббийлик тажрибасига соя сола олмайди. Шунинг учун ҳам унга бу сафар янада жиддийроқ клубдан таклиф келиб тушди ва бунга мураббий ҳам ижобий жавоб қайтарди.
“Хўжанд” клубини ўзбекистонлик ишқибозлар ҳам яхши биладилар. Тожикистонда “Истиқлол”дан кейинги кучли жамоа сифатида қайд этиб келинади. Ўтган йили ОФК Кубогида қатнашгани ва “Сўғдиёна”га қарши баҳс олиб борганини ҳам эсласангиз керак. Эндиликда “Хўжанд” ўз олдига қўйган вазифасини ҳамюртимиз билан биргаликда амалга оширмоқчи.
Нўъмон Ҳасановнинг юртимиздаги охирги иш жойи “Навбаҳор” бўлганини билсангиз керак. Ундан аввал “Қўқон-1912” жамоасига бош мураббийлик қилган. Қолаверса, “Пахтакор”да ҳам бир неча йиллар мобайнида иш олиб борган. У мураббийликда тўплаган билим ва малакаларини энди “Хўжанд” клубида амалга татбиқ этиши керак.
Тожикистон чемпионатида 6 та тур ортда қолди. “Хўжанд” клуби эса 1 ғалаба, 4 дуранг ҳамда 1 мағлубият билан мусобақа жадвалида 7 очко жамғариб 8-поғонада боряпти. 4 май куни Ҳасанов янги жамоасида ўзининг дебют ўйинини ўтказади. “Хўжанд” бу сафар ўз майдонида ЦСКА-Помир жамоасини қабул қилади.
“Хўжанд” клуби ижрочи директори Мурод Умаров янги бош мураббийни таништириш чоғида шундай деди: “Бизнинг умумий вазифамиз шундайки, барчамиз бирлашиб, изчиллик билан муваффақиятга эришамиз. Шунингдек, Рустам Ходжаевга жамоага қўшган ҳиссаси ва меҳнатлари учун миннатдорчилик билдираман. Унинг бошчилигида жамоа биринчи бор ОФК Кубогининг гуруҳ босқичидан ўтди ва Тожикистон Кубоги соҳибига айланди. Унинг мураббийлик фаолиятида омад тилайман”.
Жамоанинг янги бош мураббийси - Нўмон Хасанов жамоа рахбариятига билдирилган ишончи учун миннатдорчилик билдириб ўтди ва совринли ўринлардан бирини эгаллашини айтиб ўтди: “Менинг талабим, ишончли узатмалар орқали комбинацион ўйин намойиш этиш. Бизнинг асосий мақсадимиз натижага эришиш. Лекин бунинг учун томошабоп ўйин намойиш этишимиз керак. Умид қиламанки, бундай комбинацион ўйинлар орқали “Хўжанд” жамоаси мухлислари меҳрини қозониб, қизиқиш уйғота оламиз”, - деди Ҳасанов.
Шуҳратбек Жўраев.
Фикрлар