Оярсабаль Кабо-Верде билан дурангдан сўнг хотиржамликка чақирди

Испания терма жамоаси сардори Микель Оярсабал жаҳон чемпионати биринчи турида Кабо-Вердега қарши учрашувдан кейин жамоанинг кутилмаган дурангини изоҳлади. Беллашув 0:0 ҳисобида якунланди.
 

Учрашувдан сўнг форвард рақиб жамоа ўйинни тўлиқ ҳимояга қургани ва катта куч билан, жуда зич тарзда ўз дарвозасини қўриқлаганини таъкидлади.
 

«Ўйин жуда оғир бўлди. Улар майдонда нима қилишини аниқ биларди, кўпинча 10-11 нафар футболчи билан ўз жарима майдони атрофида тўпланишди. Бизда гол уриш учун етарлича имкониятлар бўлди, лекин ҳал қилувчи паллада аниқлик ва кескинлик етишмади», – дея Оярсабалнинг сўзларини Marca нашри келтиради.
 

Унинг қўшимча қилишича, жамоа вазиятга ортиқча ҳис-ҳаяжонсиз ёндашиб, хато ва камчиликларни таҳлил қилиши керак.
 

«Осойишталикни ва ўзимизга бўлган ишончни сақлашимиз зарур. Нимани тўғрилаш кераклигини англаб, олдинга қараб ҳаракат қилишимиз лозим. Албатта, мусобақани ғалаба билан бошлашни истардик, аммо ҳозирги пайтда энг муҳими – бир бутун жамоа бўлиб қолиш», – дея таъкидлади Оярсабал.
 

21 июнь куни Испания жаҳон чемпионати иккинчи турида Саудия Арабистони терма жамоасига қарши майдонга тушади.