Ўзбекистон терма жамоаси АҚШни мағлуб этди

Ўзбекистон ёшлар терма жамоаси (U-23) навбатдаги ўртоқлик учрашувида АҚШ ёшлар терма жамоаси (U-21) устидан ғалаба қозонди. 

Беллашув Словениянинг Рогашка-Слатина шаҳрида жойлашган "Športni center Rogaška Slatina" стадионида ўтказилди. Учрашув ягона гол эвазига 1:0 ҳисобида ўзбекистонлик ёшлар фойдасига якунланди.

Бу ғалаба Ўзбекистон ёшлар терма жамоаси учун сўнгги ойлардаги илк муваффақият бўлди. Жамоа аввалги ўртоқлик ўйинларида бир қатор мағлубиятларга учраган эди: июнь ойида Япония U-21 термасига 0:1 ҳисобида ютқазган, март ойида эса Албания U-21 (2:3) ва Россия ёшлар терма жамоасига (1:2) мағлуб бўлган.

АҚШ ёшлар термаси устидан қўлга киритилган бу ғалаба ўзбекистонлик футболчиларга нохуш серияни тўхтатиш, шунингдек, келгуси халқаро мусобақалар олдидан тайёргарликнинг навбатдаги босқичини ижобий руҳда якунлаш имконини берди.