Ўзбекистонлик теннисчи Пекинда сенсация кўтарди

Ўзбекистон шарафини ҳимоя қилаётган теннисчи Камилла Рахимова (WTA рейтингида 76-ўрин) Пекинда (Хитой) ўтаётган WTA 1000 турнирининг иккинчи босқичида канадалик Лейла Фернандесни (26-ўрин) мағлуб этди, деб хабар бермоқда Sports.kz.

Учрашув 6:2, 4:6, 6:3 ҳисобида Рахимова фойдасига якунланди. Беллашув икки соат 33 дақиқа давом этди. Биринчи сетда устунликни қўлга киритган ўзбекистонлик спортчи иккинчи сетда рақибасига имкониятни бой  берди ва ҳисоб сетлар бўйича тенглашди. Қатъий кураш руҳида ўтган ҳал қилувчи сетда эса Рахимова яна бир бор устун келиб, мусобақанинг учинчи босқичига йўл олди.

Учрашув давомида Камилла 11 та брейк-пойнтдан 5 тасини ишга солишга муваффақ бўлди, Фернандес эса 4 та имкониятдан иккитасидан фойдаланди. Иккинчи тўп узатиш вақтида Рахимова очколарнинг 63 фоизини қўлга киритган бўлса, канадалик теннисчи бу кўрсаткич бўйича 35 фоиз билан чекланди.

1/16 финалда Рахимова АҚШ вакили Ива Йовичга қарши майдонга тушади. У жаҳон рейтингининг 13-поғонасини эгаллаб турибди. Ушбу баҳс ғолиби турнирнинг тўртинчи босқичига чиқади.