Аввал хабар берганимиздек 13 февраль куни Қаршининг “Насаф” клуби Осиё чемпионлар лигаси гуруҳ босқичи илк баҳсини Эронда Техроннинг “Персеполис” клубига қарши ўтказади.

Клуб расмий сайти эса мухлислар учун “аждарлар”нинг бўлажак рақиби ҳақида бир қатор қизиқарли маълумотларни эълон қилди.

Теҳрон шаҳрининг “Персеполис” профессионал футбол клуби 1963 йилда ташкил этилган. Эрон Про-лигасида иштирок этади.  Бу клуб бой тарихга эга бўлиб, Эроннинг энг кучли клубларидан ҳисобланади. Эрон чемпионатида учта клуб совринлар йиғиш бўйича етакчи ҳисобланишади. Шу уч клубнинг биттаси, “Персеполис” клубидир.

Жамоага айни пайтда хорватиялик мутахасис Бранко Иванкович устозлик қилмоқда. “Персеполис” жамоаси ўз уй учрашувларини Теҳрон шаҳридаги афсонавий “Озодий” стадионида ўтказади.

“Персеполис” ўтган мавсум ОЧЛнинг ярим финалида Саудия Арабистонининг "Ал-Ҳилол" клуби билан баҳс юритган. Теҳронликлар ярим финалдаги дастлабки, ўз майдонидаги учрашувда 2:2 ҳисобида дуранг қайд этади ва сафардаги жавоб учрашувида, йирик 4:0 мағлубиятга учраб, финал йўлланмасини қўлдан бой беришган эди.

“Персеполис” Эроннинг 10 карра чемпиони, 9 карра вице-чемпиони ҳисобланади. Жамоа шунингдек мамлакат кубогида  5 марта зафар қучган.

Ушбу жамоа шунингдек 1991 йили Осиё кубок эгаларининг кубогини қўлга киритган ва бир марта ушбу мусобақанинг финалчиси бўлган.

Шу ўринда Эрон Про-лигаси ҳақида ҳам икки оғиз. Ушбу чемпионат 16та жамоа иштирокида  куз-баҳор тизимида ўтказилади. 16та жамоа икки даврадан иборат тизимда, уй-сафар учрашувларида ўзаро баҳслашади.

Айни пайтда Эрон про-лигасининг 23-тур баҳслари давом этмоқда. “Персеполис” турнир жадвалидаги таъқибчисидан 16 очко олдинда бормоқда ҳамда якка пешқадамлик қилмоқда.

“Персеполис” клуби Эроннинг  амалдаги чемпиони ҳам ҳисобланади. Жамоанинг 70-рақамдаги ҳужумчиси Али Алипур 17та гол уриб, Эрон про-лигасининг тўпурари бўлиб турибди.

“Персеполис” таркибида маҳаллий футболчилар қатори легионер футболчилар ҳам тўп тепишади. Булар, нигериялик 90-рақамдаги ҳужумчи Годвин Менша, 44-рақамдаги хорватиялик дарвозабон Бужидор Радошевич ва 5-рақамдаги ироқлик ўйинчи Башар Буниянлардир.

Эслатиб ўтамиз, “Персеполис” – “Насаф” учрашуви 13 феврал сешанба куни Теҳрон шаҳридаги “Озодий” стадионида, бизнинг вақт билан соат 18:15да бошланади.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98