"Одилов бундан ҳам яхши ўйнай олади, Ўзбекистондан таклиф бор" - "Химки" футболчиси

Россия премьер лигаси вакили – “Химки” шарафини ҳимоя қилаётган сербиялик 27 ёшли тажрибали ҳимоячи Неманья Анжелкович ушбу йилнинг ёзида “Акрон” клубидан ўтган бўлиб, 11 та учрашувда майдонга тушди ва 1 та голли пасни узатди.

Нега ушбу ҳимоячи ҳақида тўхталяпмиз? Биздаги маълумотларга қараганда, “Химки”нинг мазкур футболчисига ўзимизнинг Суперлигадан қизиқишлар йўқ эмас. Қолаверса, у “Химки”да ҳамюртимиз Алишер Одилов билан бирга фаолият олиб борди.

Ҳозирда таътилда бўлган сербиялик Анжелкович билан Sports.uz мухбири алоқага чиқди ва қисқача суҳбат ўтказди.

- Неманья, адашмасам ўзбек матбуоти вакили сиз билан илк бор боғланмоқда-а?

- Ҳа, бу биринчи марта.

- “Химки” таркибида ҳаюмртимиз Алишер Одилов ҳам бор. Бироқ у ҳали асосий жамоада дебютини ўтказгани йўқ. У ҳақида фикрингиз қандай?

- У яхши футболчи. Ҳали ёш  ва истиқболли. Умид қиламанки, у бундан ҳам яхшироқ даражада ўйнай олади.

- Бизнинг Суперлигамизда кўплаб сербиялик футболчилар тўп суришади. Уларни билсангиз керак? Масалан, кимлар билан яқин муносабатдасиз?

- У ерда Сербиядан кўп футболчилар бор. Масалан, Филип Ивановични яхши танийман ва биз дўстмиз. Шунингдек, Марушич, Роган, Цигер ва Йововични биламан.

- Неманья, сизга ўзбек клубларидан ҳам таклифлар бўлганми?

- Менда Ўзбекистондан таклиф бор, аммо ҳали бир қарорга келмадим.

- Умуман, Ўзбекистон чемпионати ҳақида нималарни биласиз?

- Кўп нарса билмайман, лекин имкон борича ўрганишга ҳаракат қиламан.