ОФК кубогининг амалдаги соҳиби "Ас Сиб" ОКМК учун ўтиб бўлмас тўсиғми?

Хабарингиз бор, 15 август санасида Олмалиқнинг ОКМК жамоаси ОЧЛ саралаш ўйини доирасида Уммонинг "Ас Сиб" клубини меҳмон қилади. Ғолиб жамоа ОЧЛ гуруҳ босқичида иштирок этиш имкониятини тақдим этадиган ҳал қилувчи баҳсда иштирок этиш ҳуқуқини қўлга киритади. Хўш, ОКМКнинг "Ас Сиб"га қарши имкониятлари қандай? Рақибнинг кучли ва кучсиз томонлари нимада? Бугун, имкон қадар кичик матн орқали Уммондан келган рақиб жамоани таҳлил қиламиз.

Ўйин услуби

Рашед Жобир жамоасининг ўйин услуби ОКМК билан у қадар катта фарқ қилмайди. 4-4-2 ёки 4-2-3-1 схемаларидан фойдаланадиган жамоа асосан эконом футбол намойиш этади. Имкон қадар рақибни эртароқ (майдон марказида) кутиб олган холда, қанотлар оқали ҳужумлар ташкил этишга уринади. Вазиятдан келиб чиқиб, 4-2-3-1 схемаси классик 4-4-2 га ўзгариши мумкин. Жамоа ҳужум чизиғида Уммон терма жамоаси аъзолари тўп суришини инобатга олсак, "Ас Сиб" ҳужум чизиғи ўз даражасидан баландроқ эканлигини тан олиш лозим.

Айни дамда "Ас Сиб" ОФК кубогини амалдаги соҳиби саналади. 2022-йилда жамоа финалда Малайзиянинг "Куала Лумпур" клуби устидан 3:0 ҳисобида ғалаба қозонгани кўпчиликнинг ёдидан кўтарилмагани аниқ. Жобир жамоаси майдонда жуда тартибли бўлибгина қолмай, чизиқлар орасидаги боғламларни ҳам аъло даражада йўлга қўйган. Кучли жамоавий ўйин биринчи планга кўтарилгани боис, клуб арабларга хос тенденциялардан бири - кучли легионерга эҳтиёж сезмайди. Айни дамда, "Ас Сиб" сафида 8 та терма жамоадан мунтазам чақирув оладиган футболчилар мавжуд.

Жамоа у қадар техник кучли футболчиларга эга бўлмагани боис, асосий урғуни жисмоний тайёргарликка қаратади. "Ас Сиб" сафида ўйинни ўзига оладиган техникаси кучли лидерлар йўқ, аммо комбинацион футбол ва қарши ҳужумларни яхши ижро эта оладиганлар етарлича топилади. Бундан ташқари, баҳс давомида устунликни рақибга бермайди ва шу билан биргаликда ўзи ҳам доминантлик қилмайди. Пастроқ темпдаги футбол улар учун айни муддао. Соддароқ қилиб айтсак, ОКМКга кўп аспектларда ўйин стратегияси борасида ўхшаб ҳам кетади.

ОКМК учун ғалаба калити нима?

Биринчи навбатда майдондаги тезкор футболчилар. ОКМК ўйин темпи ва футболчиларнинг тезлиги борасида рақибдан сезиларли даражада кучлироқ. Қўшимчасига, иккинчи қаватдаги ўйин борасида ҳам Миржалол Қосимов жамоаси рақибдан класс борасида кучлироқ. Айни дамда, Олмалиқликлар ички биринчиликда ностабил ўйин кўрсатаётганига қарамай, Қосимов битта ўйинга жамоани тайёрлаш борасида тажрибали. Бу омил ҳам ОКМК учун қўшимча плюс. Рақибдан фарқли ўлароқ, юқори темпда ҳам тўп суришга қодир бўлган Қосимов шогирдлари биринчи бўлимнинг илк дақиқаларидан олдинга ташланиши аниқ. Шундай бўлсада, "Ас Сиб"ни эрта сафдан чиқаришга ҳали эрта. Меҳмонлар таркиби деярли 3 мавсумдан бери ўзагини сақлаб қолмоқда. Бу эса, Жобир шогирдлари Олмалиқдаги баҳсда юқори концентрация билан тўп суришини англатади.

Бундан ташқари, тартибли ҳимояланган жамоа мудофаасини ёриб ўтиш учун ОКМК яхшигина куч сарфлаши лозим. Катта эҳтимол, меҳмонлар тўп назоратини мезбонларга топширганча, майдонда иккинчи рақамда ҳаракат қилади. Икки жамоа ҳам тежамкор режимда ҳаракат қилишини ҳисобга олсак, баҳс экстра-таймларга ўтиши ҳам ҳеч гап эмас. Ўйиннинг илк 15 дақиқасида ҳисоб очилмаса, бизни чинакам шахмат парйтиясига айландиган баҳс кутиб турибди.

Тахминий таркиб

"Ас Сиб": Ал Ваҳаиби, Ал Мусалами, Ал Ҳабси, Ал Бусаиди, Ал Ажми, Ал Блуши, Ал Яҳё, Ал Фарси, Муҳаммад Ҳабси, Ал Муқбали, Ал Ғассони

ОКМК: Эргашев. Аҳмадалиев, Раҳмонов, Исмоилов, Денисов. Абдуллаев, Турсунов, Ҳақназари. Боьаке, Ғиёсов, Санчес.