ОФК расмий сайтидан Ўзбекистон - Сингапур ўйини учун превью

Ўзбек футболи учун яна ҳаяжонли лаҳзалар етиб келди. Аввалгиларидан фарқли ўлароқ, бу сафар барчаси ўз қўлимизда. Олдимизда турган 3 ўйинни ўз фойдамизга ҳал қилиш орқали кейинги босқичга йўл олишимиз мумкин. Бир қарашда ҳозирги таркиб билан Жаҳон Чемпионатида ўйнашга 100% тайёрмиз. Буни бир неча хорижлик мутахассислар ҳам таъкидлаб ўтганини сайтимиз томонидан уюштирилган интервьюларда ўқиган бўлсангиз керак.

Демак, олдимизда турган илк синов - Сингапур. Биринчи даврада шарқий осиёликлар устидан жуда ишончли ҳисобда ғалаба қозонганмиз. Элдор Шомуродов катта саҳнага чиққан эди ўша беллашувда. Бу сафарги ўйин олдидан қитъа миқёсидаги биринчи манба превьюни тақдим этди. Қуйида ушбу мақолани тўлиқлигича эътиборингизга ҳавола этишни мақсад қилдик:

"Икки томоннинг 4-турдаги ўзаро тўқнашуви Ўзбекистоннинг 3:1 ҳисобидаги ғалабаси билан якунланди. Одил Аҳмедовнинг жарима зарбасидан киритган тезкор голига бўлим сўнгида Ихсан Фанди жавоб қайтарди. Элдор Шомуродовнинг иккинчи таймдаги дубли эвазига ўзбеклар 3 очкога эга чиқди.

Мураббий Вадим Абрамов шогирдлари "D" гуруҳида 9 очко билан иккинчи ўринни эгаллаб, Саудия Арабистонидан 5 очкога ортда қолмоқда. Аммо улар 1 та кам ўйинда майдонга тушган. Кейинги икки беллашувда улар Сингапур ва Яманга қарши ҳаракат қилади ва ушбу қарама-қаршиликлар "оқ бўрилар" учун жуда муҳим. Боиси, агар Ўзбекистон Саудияга қарши ўйинда ҳам ғалаба қозонса, гуруҳда биринчи ўрин билан кейинги босқичга йўл олиш имкониятини қўлга киритади.

Айни пайтда 6 баҳсда майдонга тушган Сингапур 7 очкони қўлга киритган. Улар сўнгги ўйинда Фаластинга 4:0 ҳисобида мағлуб бўлганидан кейин, гуруҳдаги ўрнини йўқотди. Аммо бу сафарги ўйинда ғалаба қозонган тақдирда, сингапурликлар 2-поғонага кўтарилиб олиши мумкин.

Мураббий Тацума Йошида учун алоҳида ташвиш мудофаа чизиғида бўлиши кутилмоқда. Чунки 14 та гол ўтказиб юборган сингапурликлар бу кўрсаткич бўйича Яман билан биргаликда энг ёмон натижани қайд этмоқда. Жуда ёмон тўплар нисбати уларга анча қимматга тушиши мумкин. Чунки Сингапур ҳам сўнгги саралаш босқичига қадар етиб боришни мақсад қилган"-дея ёзиб қолдирган ОФК расмий сайти.

7 июнь кунги муҳим ўйин олдидан ҳар икки терма жамоа бош мураббийи иштирокида матбуот анжумани ташкил этилди. Унда биринчи бўлиб жамоамиз бош мураббийи Вадим Абрамов иштирок этди ва берилган саволларга жавоб қайтарди:

"Биринчи ўйинимизни кутяпмиз. Бу янгича форматдаги турнир. Биз олдиндаги ўйинларга яхши тайёргарлик кўрдик. Aнча вақт расмий ўйинда майдонга тушмадик. Aлбатта, Саудия Aрабистони бу турнирда устунликка эга. Лекин ҳаммаси ўз қўлимизда. Бу футбол. Имконият 50/50. Саудиягача яна иккита учрашувимиз бор. Ушбу баҳсларда ҳам ғалаба қозонишимиз керак.

Йўқотишлар йўқ ва ҳамма соғ-саломат. Фақат Ойбек Бозоровда дисквалификация бор", - деди мураббий.

Умуман олганда, барчаси жойида. Мураббий сўнгги ўртоқлик ўйинидан кейин ташкил этилган матбуот анжуманида таъкидлаганидек, ўз қарталарини очмоқчи эмас. Бу ҳолат позитив фикрлайдиган инсонга яхши умидлар бериши турган гап. Бироқ мухлислар қуруқ гапнинг ўзигагина қаноат қилмайди. Шунга қарамай, йўқотиш ҳам йўқ эмас. Ўзининг ажойиб техникаси ва ақлли қарорлари билан Суперлига юлдузига айланиб улгурган Ойбек Бозоров Сингапурга қарши ўйинда иштирок этмайди. "Насаф" вингери U23 жамоаси сафида Осиё кубогининг 3-ўрин учун беллашувида қизил карточка олиб, майдонни эрта тарк этишга мажбур бўлганди.

Бугунги превью орқали вакилларимизнинг ушбу рақибга қарши сўнгги тўқнашувини ёдга олдик. Навбатдаги ўйин 3 очкодан кўп нарса бериши турган гап. Мотивация, синов ҳамда мухлислар ишончини тақдим этадиган учрашув 7 июнь куни 23:00 да старт олади. SPORTS.uz билан қолинг, "оқ бўрилар"нинг овини биргаликда кузатиб борамиз!