ОФК томонидан дисквалификацияга учраган футболчимиз ҳақида! Аслида нима бўлганди?

Яқинда ОФКнинг тартиб-интизом қўмитасининг қарорлари эълон қилинди. Унга кўра, ўтган йилнинг 6-10 ноябрь кунлари Саудия Арабистонида Осиё чемпионати саралаш баҳслари ўтказилганди. Ўшанда терма жамоамиз гуруҳдаги охирги турда мезбонларга қарши баҳс олиб борганди. Афсуски, биз учун омадсиз якунланган мазкур тўқнашувда терма жамоамиз аъзоси Одил Абдумажидов ҳакам томонидан қизил карточка туфайли майдондан четлатилганди. Қолаверса, ўйин пайтида ҳам иккала жамоа аъзолари ўртасида айрим тортишувли вазиятлар ҳам бўлганди. Хуллас, ОФК тартиб-интизом қўмитаси Абдумажидов билан боғлиқ вазиятни ўрганиб чиқиб, футболчимизни икки ойга футболдан четлаштирди ва 2000 доллар миқдорида жаримага ҳам тортди.  

- Тўғрисини айтсам, ўшанда бунинг чемпионатга ва клубимизга таъсири бўлишини билмагандим, - дея гап бошлади Абдумажидов. - Ўзим кутмаган нарса бўлди. Тўғри, аслида эса ўша Осиё чемпионати саралашидаги охирги учрашувдан сўнг иккита ўйинга четлатилишим мумкинлиги ҳақида айтишганди. Ҳозирча, ЎФА томонидан менга ҳеч нима дейилмади. Менинг четлатилишим борасида клубимизга хат келган. Мен шундан сўнг бу ҳақида хабар топдим. “Металлург”дагилар эса менга катта далда бўлишяпти ва ҳеч нима йўқотилмаслигини, икки ой сабр қилиб туришимни айтишди. Аммо ўз устимда ишлашни тўхтатмайман. Аслида эса ўша учрашувда мен рақибга нисбатан ҳеч нима қилмаганимни ўша пайтдаги мураббийларимиз ҳам яхши билишарди. Аммо менга атайин қизил карточка кўрсатганини ҳамма кўрган, бу видеода ҳам яққол кўриниб турганди.

- Ҳаммаси уюштирилган деб ўйлайсизми?

- Бу нарса уюштирилган, деб ўйламайман. Аммо ўшанда дарвозамизга йўқ жойдан пенальти белгиланган. Ўша вазиятда бурчакдан тўп ўйинга киритилганида ҳужумчимиз тўпни қайтарган. Уларнинг ўйинчиси эса бизнинг футболчимизга бориб урилганди. Ҳакам эса шу вазиятга пенальти берганди. Бундан ҳайрон бўлган ҳолда 3-4 футболчи бўлиб ҳакам олдига бориб, ўзбекчалаб “нима бўлди, ҳозир?” деб гапирганмиз. Ҳакам эса шу пайт менга қизил карточка кўрсатди. Ҳолбуки, ўша вазиятда ҳеч қандай қизил карточкага тортадиган ҳолат юз бермаган. Масалан, мен пенальти белгиланишига сабабчи бўлиб қолмагандим. Шунчаки, дарвозамизга қўйилган пенальти учун австралиялик ҳакамга ўзбекча гапирганим учун мени майдондан четлатган. Менинг ҳарактеримни барча мураббийлар ҳам билади. Мен ҳакамнинг ёнига бориб, уни ҳақорат қиладиган ўйинчи эмасман. У эса 3-4 та ўйинчи орасидан менга қизил карточка кўрсатган ва бу тушунарсиз ҳолат эди. Аслида ўша Саудияга қарши учрашувда биз катта тайёргарлик билан майдонга тушгандик. Ундан олдин 2002 йилда туғилган футболчилар ўртасидаги саралаш баҳсларида улар туфайли биз гуруҳда қолиб кетгандик. Шу сабабли бу сафар биз уларни гуруҳда қолдириб кетиш ниятида эдик. Бунинг учун биз ўйинга жуда жиддий тайёрлангандик. Мураббийларимиз ҳам бизни ўйинга ажойиб ҳолатда руҳлантиришганди. Майдонда жиддий кураш кечганди. Эсимда, ўша баҳсда биз ҳар бир тўп учун қўрқмасдан курашганмиз. Мени майдондан чиқариб юборганидан кейин ҳам жамоадошларим битта ўйинчи кам бўлиб қолишларига қарамай, саудияликлар билан тенгма-тенг курашишганди. Мураббийларимиз ватан учун ўйнаш қандай бўлишини бизга жуда яхши тушунтира олишганди. Ортимизда халқимиз бизни қўллаб турганини билиб, майдонга кучли иштиёқ билан тушгандик. Ўша пенальти берган вазият ҳам адолатдан эмасди. Ечиниш хонамизда биргина мен эмас, бошқа жамоадошларим ҳам йиғлаб юборишганди.

- Балки ўша вазиятда ҳакам сизни ҳақорат қилди, деб ўйлагандир...

- Ҳа, балки ҳакам мени ҳақорат қиляпти, деб ўйлагандир. У фақат инглиз тилини биларди. Русча гапирай десам ҳам, у барибир тушунмасди. Шундан кейин ҳакам менинг устимдан ёзган. Натижада ОФК мен билан боғлиқ шундай қарорни чиқарди. Энди мен еттита турни ўтказиб юбораман. Насиб қилса, “Насаф” билан бўладиган учрашувда майдонга қайтаман.

- Бу ҳолатга клубдагиларнинг муносабати қандай бўлди?

- Энг муҳими, “Металлург” клуби ва Андрей Шипилов мени қўллаб-қувватлаяпти. Уларнинг далдаси мени руҳлантириб турибди.

- Ёшлар терма жамоасига Тимур Кападзе бош мураббий этиб тайинлангач, у сизни ҳозирча фақат битта йиғинга чақирди...

- Тўғри, ҳозирча Тимур Кападзе мени битта йиғинга чақирди. У ҳам менинг охирги учрашувда қизил карточка олганимни биларди. Лекин ундан олдинги мураббий Отабек Ғуломхўжаев ҳам жуда яхши жамоани шакллантириб қўйганди.

- У ҳолда иккала мураббийнинг иш услуби ўртасидаги фарқ билиняпти, шундайми?

- Умуман айтганда, Тимур ака билан Отабек аканинг услублари бир хил экан. Кападзе ҳам пас ўйнашни ёқтиради. Балки менинг йиғинларга чақирмаётганининг сабаби иккита учрашувда иштирок эта олмаслигим учун ўрнимга бошқа ўйинчиларни кўраётгандир.

- Шу йили Тошкентда ёшлар ўртасидаги Осиё чемпионати бўлиб ўтади. Кападзе бошчилигидаги жамоа таркибидан жой олишингизга қанчалик ишоняпсиз?

- Албатта, ҳар бир ўйинчида ватан учун ўйнаш бўйича катта ният ва иштиёқ бўлади. Мураббийларнинг ишончини қозониб, зиммамдаги вазифани бажаришга бор кучимни сарфлайман. Фақат бунинг учун ҳозирги ҳолатни сабр билан босиб ўтишим керак. Мен яна ўз устимда ишлашда давом этаман ва “Металлург”нинг ҳам асосий таркибига киришга ҳаракат қиламан.