Олимпиада якунланди, энди навбат Паралимпия ўйинларига!

Бугун "Токио-2020" ёзги Олимпия ўйинлари ўз якунига етди. Сайёрамизнинг 206 та мамлакатидан 12 500 нафарга яқин атлет ғолиблик учун кураш олиб борди.

Ўзбекистон делегацияси 3 та олтин ва 2 та бронза медали билан якунда умумжамоа ҳисобида 32-ўринни эгаллади.

Энди орадан саноқли кунлар ўтгач, аниқроғи 24 август куни Токио шаҳрида XVI ёзги Паралимпия ўйинлари старт олади. Унда сайёрамизнинг турли ҳудудларидан келган 5 мингга яқин пара атлет 540 та медаллар тўплами учун кураш олиб боради.

Шу ўринда айтиб ўтиш лозим, ўзбекистонлик паралимпиячилар Паралимпия ўйинларида илк бор 8 та спорт туридан мусобақаларда иштирок этади.

Бундан аввал, "Рио-2016" ёзги Паралимпия ўйинларида паралимпиячиларимиз 5 та спорт туридан баҳсларда қатнашган ва 32 та спортчи 31 та медалга сазовор бўлган ҳолда умумжамоа ҳисобида 16-ўринни қўлга киритган.