"Олимпик" дурангга хурсанд, Шарич талабимизга жавоб бермаяпти" ёхуд Илҳом Мўминжонов яна мухлислардан узр сўради

“Нефтчи” – “Олимпик” (0:0) учрашувидан кейин фарғоналиклар бош мураббийи Илҳом Мўминжонов саволларга жавоб қайтарди.

- Бугунги ўйин учун футболчиларимга раҳмат айтаман. Майдонда бор кучларини беришди. Захирамиз жуда кам. Шунга қарамай, Суннат Абдуллажоновни туширдик, 90-дақиқада яна бошқасини қўйдик. Жароҳат олган футболчиларимиздан 4-5 таси 2-3 кундан кейин машғулотга қўшилишади. Бугунги бир очко билан табриклайман. Бироқ ютсак бўларди. “Олимпик” жамоасида деярли хавфли вазият бўлмади. Иккита голли имкониятимиздан эса йигитлар фойдалана олишмади. “Нефтчи”га ҳозирги жой ярашмайди. Тушган чуқурликни ўйинчилар яхши билишяпти, ҳатто ўйиндан кейин ҳам уйларига боришмаяпти. Худо хоҳласа, чиройли ўйинлар кўрсатиб, очколар оламиз.

- Ўзгариш қилишга шошилмадингиз ва кеч амалга оширдингиз.

- Ўзгаришларни ўйин сифатига қараб қилдим. Иккита футболчимиз бор – Ойбек Қиличев билан Суннат Абдуллажонов.

- Мавсум бошида Шуҳрат Раҳмонов билан Шодиёр Ҳожиматов “заявка”га киритилмади...

- Улар “Нефтчи”да қоладиган бўлишди. Суперлига ва про лигадан вариантлари бор эди. Ҳожиматовга шахсан ўзим жавоб бермадим. Чунки иккинчи даврада бизга керак, ўйнайди, деб ўйлайман.

- Шарични нега захирадан майдонга туширмадингиз?

- Шарич ҳозирги кунда талабга жавоб бермаётган ҳужумчилардан биттаси. Шу боис уни қўймадим. Ҳужумда Шаҳзод Убайдуллаев ва Улуғбек Ҳошимовдан фойдаланяпмиз. Кўриб турибсизлар, осон ўйинлар йўқ. Мухлисларимиздан яна узр сўрайман. Ўтган йили осмонда эдик, бу йил пастдамиз. Жамоа янги йиғилди. Бу ерга келган футболчиларга ҳам раҳмат айтаман. Ҳали ҳаммаси олдинда. Изланишда давом этамиз. Кейинги учрашувга бир ҳафтача вақт бўлса-да, эртадан яна машғулотга киришамиз.  

- “Олимпик” бироз чўчиб ўйнади...

- “Олимпик” – бу ўтган йилги “Олимпик”. Фақат “Насаф”дан ва яна айрим клублардан кимдир қўшилди. Ўтган йили ҳам тўрт марта ўйнаганмиз. Бу йил ҳам учрашдик. Ўтган йили про лигадаги футболчилар билан ишлашяпти. 18-19 ёшли ўйинчилар. Терма жамоадаги ҳар бир чизиқда тўп сураётган энг кучли йигитлар жамланган. Босимда ўйнадик. Биринчи бўлимда рақиб тезлик қилди. Лекин “Олимпик”да голли вазият бўлмади. Улар бу дурангга хурсанд. Биз икки очкони йўқотдик. Ютишимиз керак эди. Ечиниш хонасида ҳам футболчилар хафа бўлиб ўтиришибди.

- Кейинги турда “Нефтчи”ни қийин ўйин кутиб турибди.

- Бизга ҳамма ўйин қийин. Суперлигада осон учрашувнинг ўзи қолмаган. Жароҳатланганлардан Сирож Қўзиев қайтади. Луфулла Тўраев 2-3 кундан сўнг сафимизда бўлади. Иззат Абдуллаев билан Умар Адҳамзода 13 майдан машғулотларга қўшилишади. Қўзиев 4-5 кундан буён машғулотда, фақат бироз жисмоний ҳолатини тиклаётгани учун бугун ўйнамади.