"Олимпик" устози: "Машғулот ва ҳақиқий ўйиннинг фарқи бор"

Про лигада 9-турга старт берилди. Мирко Еличич бош мураббийлик қилаётган "Олимпик" клуби бу сафар ўз майдонида Нукуснинг "Арал" жамоасини қабул қилди.

Маълумки, таркиби анча ёшартирилган "Олимпик" охирги пайтларда ижобий натижалар қайд эта олмаяпти ва бу ҳолат ушбу турда ҳам давом этди. Қизиқарли ўтган ўйинда меҳмонлар ягона гол эвазига ғалаба қозонди. "Арал" ғалабадан кейин очколариин 16 тага етказиб, вақтинча иккинчи ўринга кўтарилиб олди. 

Натижада "Олимпик" чемпионатда 6-мағлубиятини қабул қилиб олди.  Мазкур беллашувдан сўнг "Олимпик" жамоаси устози Мирко Еличич матбуот анжуманида иштирок этди. 

"Ўйин қийин ўтди. Биз яхши футбол ўйнадик ва менга бу ёқди. Жамоамиз ёшлардан иборат эканлигини инобатга олсак, бизнинг асосий вазифамиз ҳам шундай. 

Ўйлашимча, йигитлар ўзларини яхши кўрсата олишди. Рақиб сафида ёши катта, тажрибали футболчилар бор эди. Уларга қарши ўйнаш қийин. Лекин ўйин борасида биз бугун яхшироқ эдик. 

- Сўнгги ўйинларда жамоа кўплаб вазиятлар яратаётган бўлса-да, уларни голга айлантира олмаяпти. Бу нима билан боғлиқ? Йигитларнинг ёш ва тажрибасизлиги биланми? 

- Бизнинг олдинда ўйнайдиган футболчиларимизнинг деярли барчаси 2007 йилги футболчилар -  Мубараковдан ташқари. У ўз вақтида, турли ёш тоифаларида голлар уриб юрарди. Бундай тажрибали ва жисмонан кучлироқ футболчиларга қарши ўйнаганингда эса барчаси қийин бўлади. Биз машғулотларда бу борада ишлаяпмиз. Лекин машғулот ва ҳақиқий ўйиннинг фарқи бор", - деди Мирко Еличич.